Արտակարգ դրությանը կփոխարինի կարանտինը

Սեպտեմբերի 4-ի ԱԺ արտահերթ նիստում օրակարգի հարցը՝ կառավարության կողմից ներկայացված ՀՀ բնակչության սանիտարահամաճարակային անվտանգության ապահովման մասին օրենքում փոփոխություններ և լրացումներ կատարելու մասին նախագիծն է։

Հիմնական զեկուցող Արդարադատության նախարարի առաջին տեղակալ Ռաֆիկ Գրիգորյանը պատգամավորների քննարկմանը ներկացրեց «ՀՀ բնակչության սանիտարահամաճարակային անվտանգության ապահովման մասին» և «Արտակարգ իրավիճակներում բնակչության պաշտպանության մասին» օրենքների և հարակից օրենքների մասին նախագիծը։

Նախագծի հրատապությունը պայմանավորված է արտակարգ դրությունը չերկարաձգելու պայմաններում անհրաժեշտ գործիքակազմի առկայություն ապահովելու անհրաժեշտությամբ։ Մասնավորապես հիմք ընդունելով այն հանգամանքը, որ 2020 թվականի մարտի 16-ին ՀՀ-ում արտակարգ դրություն հայտարարելու մասին հիմք ծառայած հանգամանքների դեմ անհրաժեշտ է պայքար ծավալել ոչ արտակարգ դրության ռեժիմի պայմաններում, ուստի անհրաժեշտ գործիքակազմը ենթարկվում է օրենսդրական փոփոխության ներկայացվող նախագծով։

Օրենսդրական փաթեթով առաջարկվում է՝ վարակիչ հիվանդությունների՝ ՀՀ տարածք ներբեռնման, ներթափանցման, դրանց ծագման և տարածման վտանգի դեպքում, բռնկումների, համաճարակի առաջացման, ինչպես նաև դրանց հետևանքով արտակարգ իրավիճակ առաջանալու դեպքերում սահմանել կարանտին։

Կարանտին կարող է սահմանվել առողջապահության բնագավառում պետական կառավարման լիազոր մարմնի առաջարկությամբ, մարզպետի, Երևանի դեպքում՝ քաղաքապետի, ինչպես նաև կառավարության կողմից։

Անհրաժեշտության դեպքում կսահմանվեն մուտքի և ելքի հատուկ ռեժիմ, պետական սահմանով հաղորդակցության ժամանակավոր դադարեցում կամ սահմանափակում, անձանց ազատ տեղաշարժի իրավունքի կամ տրանսպորտային միջոցի տեղաշարժի սահմանափակումներ, ինքնամեկուսացում, մեկուսացում։

Այս փուլում այլևս չի գործի էլեկտրոնային հսկողության համակարգի միջոցով մարդկանց տեղորոշման համակարգը, տնտեսական գործունեության արգելման դեպքերը։

Քրիստինե Հովսեփյան