Այսօր կառավարության շենքի դիմաց բողոքի ակցիա միայնակ իրականացնող Արմենակ Խաչատրյանը նախկին գործարար է։ Լրագրողների հետ զրույցում նշեց, որ տարիներ առաջ թռչնաֆաբրիկայի սեփականատեր է եղել, մոտ 500 աշխատեղ է ստեղծել, սակայն նախկին կառավարության հետ, «լեզու չգտնելով», հեռացել է երկրից։ Իշխանափոխությունը վերադարձի և կրկին գործարարությամբ զբաղվելու հույսեր է ներշնչել, բայց վարչապետ Նիկոլ Փաշինյանը իրեն հատուկ ընդունելության չի արժանացրել, ինչը անհասկանալի է մնացել գործարարի համար։
«Հովիկ Աբրահամյանը, օրինակ, ու մյուս վարչապետերն էլ գալիս էին դռան մոտ, արագ բարձրացնում էին վերև։ Հատկապես Հովիկ Աբրահամյանը ասում էր. «Արմեն ջան, հանկարծ չկանգնես ստեղ»»,– հիշեց Խաչատրյանը։
Վերջինիս խոսքով՝ 2018-ից հետո ինքն արդարացվել է, այնուհետև փորձել է ստեղծել «Գյուղատնտեսական շտապ օգնություն» հասարակական կազմակերպություն, որպեսզի օգնի գյուղացիներին և ոչ ոք իր օրը չընկնի։ Բայց այժմ Խաչատրյանի անձնական դիտարկումները ցույց են տալիս, որ իշխանափոխությունից հետո վիճակը խորացել է, «լայք-դիսլայքով» երկիր չեն կառավարում, «էս ասֆալտապատումը, բանը աչքկապություն ա»։
Հընթացս՝ եռանդուն գործարարը գյուղերում գյուղատնտեսության զարգացման ծրագիր է գրել, բայց կառավարության կողմից՝ ձայն բարբառո անապատի։ Գյուղացիների հոգսերով անքուն գիշերներ լուսացնելու արանքում Խաչատրյանի տունը վաճառվել է բանկային պարտավորությունները չկատարելու հետևանքով, մնացել են միայն տարբեր ցուցահանդեսների բուկլետներ, որ ամեն օր բերելու է կառավարության շենքի առաջ լցնի, գնա։
Խաչատրյանը նշում է, որ միշտ էլ խոսել է։ Էն ժամանակ դեմ էր, որ «զինվորը ամերիկյան բուդ էր ուտում», հիմա էլ բարձրաձայնում է, որ «ամերիկյան ցեցը կերել է բերքը»։ Նախկինների ժամանակ է բիզնեսը կորցրել, բայց հիմա դա չէ խնդիրը։ Հիմա կարևորը այլ է՝ եթե ասում են՝ «Խաչատրյան Գագոն թալանել ա, հետ ենք բերում։ Բա էտ բերածից մեզ էլ տվեք, մենք էլ ենք վախտին կաշառք տվել»։
Էլ իր մասին չի անհանգստանում ազգասերը (իրենն արդեն կորել է), գյուղացիների համար է իր կռիվը, որ վաղն են կորցնելու։
Ի դեպ՝ լրագրողների համառ հարցադրումներից այդպես էլ պարզ չդարձավ, թե ո՞ր գյուղերի բնակիչների շահերն է ներկայացնում Խաչատրյանը։
Քրիստինե Հովսեփյան
