Արդարադատության նախարար Ռուստամ Բադասյանը լրագրողների հետ զրույցում նշեց՝ ամբողջությամբ չի ծանոթացել Մարտի 1-ի տուժողների իրավահաջորդների հայտարարությանը և պատճառաբանություններին, սակայն առանձին դեպքերում տեսնում է միտումներ դատական նիստերը ձգձգելու և արդարադատությունից խուսափելու որոշակի երևույթներ, դատավորներն առանց պատճառների ինքնաբացարկ են հայտնում, կամ չեն հայտնում, երբ դրա անհրաժեշտությունը կա։
Նախարարի խոսքով՝ բարեփոխումներ դատաիրավական համակարգում իրականացվում են և բավական ինտենսիվ ընթացքի մեջ են։ Ձեռնարկվում են քայլեր, բայց կոնկրետ գործի հետ կապել բարեփոխումները, ճիշտ չէ։
Բադասյանը հրաժարվեց Մարտի 1-ի դատավարության մասով մեկնաբանություններ տալուց՝ պարզաբանելով, որ նախարարը արդարադատության ոլորտում քաղաքականությունն է մշակում, իսկ Հայաստանում դատարանները առանձին համակարգ են, և կոնկրետ գործերի քննության հետ ինքն առնչություն չունի։
Անդրադառնալով Գերագույն դատարան ստեղծելուն ուղղված քննադատություններին և շրջանառվող մեկնաբանությանը, որ ամեն ինչ արվում է Հրայր Թովմասյանին Դատարանից դուրս թողնելու համար, Բադասյանն ասաց, որ զարմանալի է լսել նման վարկածներ, որովհետև չկա մարդ կամ մարդկանց խումբ, ում պատճառով, կամ ում չեզոքացնելու համար հնարավոր է կայացնել որոշում բարձրագույն դատական մարմինները միավորելու։ Դա գաղափարական որոշում է, դա սահմանադրականության ոգին դատական համակարգ բերելու խնդիր է լուծում, և դա հեռուն գնացող բարեփոխում է, որ արվում է ՀՀ քաղաքացիների համար, արվում է դատական համակարգում փոփոխությունների շարք սկսելու միտումով։ Նախատեսվում է հոկտեմբերի վերջին ունենալ հայեցակարգ, որը կհանձնվի հանրային քննարկման։
Քրիստինե Հովսեփյան
