Երևանի ավագանին այսօր փոխքաղաքապետ ընտրեց առաջադրված թեկնածու Սերգեյ Ներսեսյանին, որ աշխատանքային հարուստ փորձ ունի ֆինանսական ոլորտում, անցյալում զբաղեցրել է պատասխանատու պաշտոններ։ Ավագանու անդամների հարցերին պատասխանեց, որ մեծ գումարների հետ աշխատելուց չի ընկրկում, քանի որ արդեն ունի նմանատիպ փորձ և պատրաստ է համատեղ աշխատանքով լուծել վարչության առաջ ծառացած բոլոր խնդիրները։
«Լույս» խմբակցության անդամ Դավիթ Խաժակյանը հարմար առիթը բաց չթողեց և անդրադարձավ կամազների հայտնի պատմությանը։
«Հայտնի է, որ պարոն Հայկ Սարգսյանն իր պաշտոնավարման ընթացքում իրականացրել է մի շարք գործարքներ, որոնք հանրության մեջ հայտնի են «շինթույլտվություն կամազների դիմաց»։ Ե՛վ հայտնի է, և՛ չի էլ հերքվել, որ այդ քննարկումները ինչպեսի ձևակերպումներ էլ որ տրվեն, իրականացրել է հենց ինքն ի պաշտոնե։ Արդյոք, եթե նման խնդիր առաջադրվի քաղաքապետի կողմից ձեր առջև՝ քննարկելու տալ, թե՞ չտալ որևէ շինթույլտվություն, դրա դիմաց ստանալ որևէ գույք համայնքի համար, կհամաձայե՞ք այդ գործառույթը իրականացնել, թե՞ ոչ»,- հարցրեց Դավիթ Խաժակյանը։
Սերգեյ Ներսեսյանը հակադարձեց, որ աշխատելու է օրենքի տառին համապատասխան․ «Ցանկացած հանձնարարական իմ վերադասի կողմից, որը չի խախտում մեր օրենսդրական պահանջները, այսինքն օրենքի տառին համապատասխան է, միանշանակ արվելու է։ Ես սովոր եմ, որ իմ ամբողջ աշխատանքային կարիերայի ժամանակահատվածում, որ եթե ունենք խնդիրներ, կապ չունի ֆինանսական բլոկին թե ոչ, եթե մենք թիմ ենք, պետք է լուծենք այդ խնդիրները բոլորս միասին։ Ես այդ գաղափարի կեղմնակիցն եմ»։
Բարձրախոսին մոտեցավ նաև Թեհմինա Վարդանյանը։ Նա, օգտելով իր հարց հնչեցնելու իրավունքից, նորից վերադարձավ Դավիթ Խաժակյանի հարցադրումներին և ավել անգամ վերհիշեց նախկին փոխքաղաքապետի անընդունելի աշխատաոճը՝ նշելով, որ իրենք աչալուրջ հետևելու են նոր պաշտոնյայի գործունեությանը։ Այնուհետև դիմեց առաջադրված թեկնածուին․
«Խնդրում եմ տոկոսայինով պատասխանեք՝ քա՞նի տոկոս եք պատկերացնում ծավալը ձեր աշխատանքի և քա՞նի տոկոսով եք պատրաստ իրականացնել այդ աշխատանքը»։
Ներսեսյանը պատասխանեց՝ ամենայն հարգանքով տիկին Վարդանյանի նկատմամբ, բայց տվյալ հարցին որևէ տոկոսային հարաբերությամբ պատասխանելը իր կողմից անպատասխանատու կդիտվի, քանզի ինքը տասնօրյա ժամանակահատված է ունեցել ուսումնասիրության համար և Երևան քաղաքի խնդիրներին, որ կան աշխատանքային գործառույթների շրջանակում, ցավոք սրտի, դեռ չի տիրապետում։ Բայց համոզված է, որ չկան անլուծելի հարցեր։
Վարդանյանը ևս մեկ անգամ շեշտեց՝ հույս ունի, որ նոր փոխքաղաքապետն ավելի արդյունավետ կհամագործակցի ընդդիմադիր խմբակցությունների հետ և վերջիններիս կողմից ուղարկված նախագծերի նկատմամբ ավելի ուշադիր կլինի։
Քրիստինե Հովսեփյան
