ԱԺ փոխխոսնակ Ալեն Սիմոնյանը, որ հաճախ է հայտնվում լրագրողների ուշադրության կիզակետում և պարբերաբար էլ ստիպված է լինում թակել դատական ատյանների դռները՝ արդարադատության ակնկալիքով, հանդես է եկել օրենսդարական նախաձեռնությամբ՝ առաջարկելով սոցիալական ցանցերում և լրատվամիջոցներում հրապարակված վիրավորանքի և զրպարտության համար փոխհատուցման չափը վիրավորանքի դեպքում 1 միլիոն դրամից դարձնել 5 միլիոն դրամ, զրպարտության դեպքում սահմանել 10 միլիոն դրամ՝ նախկին 2 միլիոնի փոխարեն։
Ալեն Սիմոնյանի դրդապատճառները հասկանալի են՝ հաշվի առնելով նրա՝ սկանդալային հոդվածներում հայտնվելու հաճախականությունը, թեպետ լրագրողներն էլ իրենց հերթին կարող են հանդես գալ նախաձեռնությամբ՝ պահանջելով մեծապատիվ պաշտոնյաների վարքագծային չափանիշների ուղիղ սահմանում, որով կբացառվեր մշուշոտ անցյալ ունեցող, բայց վերին օթյակներ ձգտող ամբիցիոզ քաղաքական գործիչների առաջխաղացումը։
Ինչևէ, չենք կարող ժխտել, որ «ազատ խոսքը» վաղուց լայն հասկացություն է և երբեմն հատում է ազատության բոլոր սահմանները՝ վերածվելով անձնական վիրավորանքի և միգուցե որոշակի զսպիչ մեխանիզմների ներդրումն ավելորդ չէ, բայց աստղաբաշխական գումարների մասին խոսելն էլ տեղին չէ։
Նախաձեռնության շուրջ բարձրացված աղմուկի մեջ, մասնավորապես ինձ համար, ամենազարմանալին ՀՀ ժուռնալիստների միության դատապարտող հայտարարությունն է։ Նախ զարմացա, որ Ժուռնալիստների միությունը կենդանության նշաններ է ցույց տալիս, երկրորդ՝ ամեն դեպքում դեռ ապրում ենք նախահեղափոխական իներցիայով, երբ միանձնյա հայտարարություններն են տարածում շեֆերը։
Հայտարարության մեջ ասված է, որ գործող իշխանությունները այս գործիքով ցանկանում են սահմանափակել ազատ խոսքն ու մամուլի ազատությունը, և, հաշվի առնելով ժողովրդավարական հասարակությունում մամուլի առանցքային դերը, միությունը կոչ է անում նախաձեռնությունը ԱԺ օրակարգ չմտցնել։
Նկատենք, որ լրագրողական այլ կազմակերպություններից դեռ պաշտոնական հայտարարություններ չկան, նաև շատ խոսուն է, որ այսքան օպերատիվ արձագանքում է միության նախագահ Սաթիկ Սեյրանյանը (թույլ տվեք՝ ավելորդ ձևականությունների հետևից չընկնել և չհիշատակել միության անդամներին), թեև, ոչ վաղ անցյալում, նախկին ոստիկանապետ Վլադիմիր Գասպարյանի՝ «Ազատության» լրագրողի աշխատանքին խոչընդոտելու վերաբերյալ լրագրողական կազմակերպությունների համատեղ հայտարարությանն այդպես էլ Ժուռնալիստների միությունը չմիացավ։
Քրիստինե Հովսեփյան
