«Մեր շատ հայրենակիցներ շատ վաղուց արտագնա աշխատանքի են մեկնում հատկապես Ռուսաստանի Դաշնություն, և պարբերաբար այս թեման բարձրանում է, բայց պետք է արձանագրել, որ սա ճգնաժամ է, համաճարակային իրավիճակ է։ Երբեմն այնպիսի տպավորություն է ստացվում, որ Հայաստանում է միայն այսպիսի իրավիճակ։ Այսօր ԱՊՀ երկրների միջև շրջանառությունն ընդհանրապես փակ է՝ դեպի Ռուսաստան և իրար մեջ նույնպես։ Եթե Ռուսաստանի Դաշնության մասին խոսենք, գրեթե բոլոր երկրների հետ փակ է շրջանառությունը»,- կառավարության նիստի ժամանակ նշեց վարչապետ Նիկոլ Փաշինյանը, բայց նկատեց, որ այսօր արդեն համաճարակային վիճակը և ընդհանուր ընկալումները հնարավորություն են տալիս, որ ԵԱՏՄ շրջանակներում այս թեմայով լինեն քննարկումներ։
Փոխվարչապետ Մհեր Գրիգորյանը հաստատեց, որ ԵԱՏՄ-ում պաշտոնապես բարձրացվել է ուղևորափոխադրումների միասնական կանոնների սահմանման անհրաժեշտությունը։ ԵԱՏՄ գործընկերները պատրաստ են համատեղ ջանքերով միասնական կանոն սահմանել, որ կգործի ԵԱՏՄ բոլոր պետությունների համար։
Ուղևորափոխադրումների վերականգման ու սահմանների բացման մասով վարչապետն ասաց՝ պլանավորվում է, որ սեպտեմբերի կեսերից գոնե մեկ, երկու տասնյակ ավիաընկերություններ կվերականգնեն կանոնավոր չվերթները դեպի Հայաստանի Հանրապետություն։
Փաշինյանը շեշտեց, որ փոփոխությունների է ենթարկվել կարանտինային ռեժիմը՝ արտերկրից ժամանած քաղաքացիները, ովքեր չեն ուզում 14 օր մեկուսանալ, կարող են անմիջապես թեստ հանձնել և բացասական պատասխանից հետո այլևս չմեկուսանալ։
Փոխվարչապետ Տիգրան Ավինյանը հավելեց, որ Հայաստանի Հանրապետությունը այս պահի դրությամբ օդային ճանապարհով մուտքի արգելք որևէ երկրի քաղաքացիների նկատմամբ չի սահմանել։ Օդանավակայանում կառուցվում են նմուշառման շուրջ 20 կետեր, որոնք կսպասարկեն երկիր մուտք գործող քաղաքացիներին։
Քրիստինե Հովսեփյան
