Նոր երևույթ չէ․ միշտ էլ այդպես է եղել, երբ ստեղծագործող, արվեստով զբաղվող մարդիկ մարզերից դեպի մայրաքաղաք են ձգտել՝ ավելի շատ տեսնելու և ավելի շուտ աչքի ընկնելու ձգտումով։ Սակայն քիչ չեն եղել, և այսօր էլ կան դեպքեր, երբ մեծ քաղաքի մեծ հնարավորություններից հրաժարվելով, արվեստագետները մնում են իրենց հարազատ ծննդավայրում ու ստեղծագործական ողջ պոտենցիալը ներդնում նրա զարգացման գործում։
Այդպիսի մարդիկ սովորաբար համոզված են լինում, որ ստեղծագործելու համար աշխարհի լավագույն վայրը հենց այն է, որտեղ ապրում են։ Ահա այդպիսի մի բազմաշնորհ արվեստագետ է նաև երիտասարդ արվեստագետ Աննան, ով ծնվել, ապրում, ստեղծագործում է Վանաձորում ու իր կյանքը հարազատ Վանաձորից հեռու չի պատկերացնում։
Աննայի բազմաթիվ զբաղմունքների մեջ գլխավոր տեղերում արվեստն ու կինոն են՝ դոկումենտալ կինոն։ Բացի դրանից, Աննան նաև կրթական ծրագրեր է դասավանդում, տեղի ռոք խմբերից մեկի պրոդյուսինգն է իր վրա վերցրել և առհասարակ, ամեն ինչ, ինչով որ Աննան է զբաղվում, կապված է Վանաձորի հետ․«Երևան գալիս-գնում եմ, երբ էներգիայով լցվելու կարիք եմ ունենում, բայց իմ` ներկայիս ողջ գործունեությունն ու բոլոր ապագա պլանները կապված են Վանաձորի հետ․ ուզում եմ իմ ծննդավայրի մշակութային, արվեստի կյանքը զարգացնել և, այո, Վանաձորից այլ քաղաք տեղափոխվելու նպատակ երբեք չեմ ունեցել ու չունեմ․ իմ նպատակներն իմ քաղաքի հետ են կապված»։
15:56
Մայիս 31, 2026
