Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, դռնփակ ռեժիմով շարունակում է քննել ՀՀ երկրորդ նախագահ Ռոբերտ Քոչարյանի գույքի վրա դրված արգելանքի վերացման միջնորդությունը։ Դատարանը պահանջել էր արգելանքի տակ գտնվող գույքի և բանակային հաշիվների վերաբերյալ ամբողջական տեղեկություն տրամադրել։ Պաշտպանները ներկայացրել են պահանջված տեղեկանքները։
Դռնփակ դատական նիստի անհրաժեշտության մասին հիմնավորումներն այդպես էլ դեռ հայտնի չեն, իսկ լրագրողների ճշտող հարցադրումներին Ռոբերտ Քոչարյանի պաշտպան Արամ Վարդևանյանը պատասխանեց. «Մի բան հաշվի առեք՝ երբ միջնորդություն է ներկայացվում դռնփակ քննության, դրա շրջանակներում են ներկայացվում հիմնավորումները։ Փակ ռեժիմը ենթադրում է գաղտնիության ռեժիմ բոլորի համար։ Եթե ես հիմա ներկայացնեմ, թե ինչ է քննարկվում դռնփակ ռեժիմով, ինքս կխախտեմ քրեական դատավարության օրենսգրքի պահանջը»։
Վերջինիս խոսքով՝ «քրեական դատավարության օրենսդրությունը նախատեսում է անձնական տվյալներին ուղղակիորեն վերաբերող տեղեկատվությունը, ինչպես նաև բանկային գաղտնիքին վերաբերող տեղեկությունը գաղտնի տեղեկություն է»։ Այլ կերպ ասած՝ պահպանվող տեղեկություն է, որը հենց դռնփակ ռեժիմում քննելու ուղղակի հիմքն է։ Այլ հիմքեր՝ պետական գաղտնիք, ազգային անվտանգությանը վերաբերող հարցեր ևս անխուսափելիորեն ենթադրում են այդպիսի ռեժիմ, ինչն օրենքի պահանջ է, ոչ թե հատուկ ցանկություն։
Քրիստինե Հովսեփյան
