«Նախ մենք տեսանք, որ տևական ժամանակ Սահմանադրական դատարանի նախկին կազմը հեռացնելու համար իշխանություններն ինչ հնարքներ էին գործադրում, ինչ ճիգեր ջանքեր, որպեսզի հեռացնեին Հրայր Թովմասյանին, մյուս դատավորներին, որոնց արդեն հեռացրել են և այդ ճանապարհը ինձ դուր չէր գալիս։ Մի կերպ այդ ամենին դիմացավ հանրությունը, որովհետև կարծում էր, որ իրոք ցանկանում են փոխել, բյուրեղյա Սահմանադրական դատարան ունենալ։ Սպասում էինք և հավատ կար, բայց առաջադրված թեկնածուները ոչ մի կերպ չեն բավարարում ՍԴ դատավորներ դառնալու չափանիշներին», առցանց քննարկման ժամանակ նշեց «Լրագրողներ հանուն մարդու իրավունքների» ՀԿ նախագահ Ժաննա Ալեքսանյանը՝ հավելելով, որ «ոչ թափանցիկ ուղիները հանգեցրին այսպիսի տխուր վերջաբանի»։
Վերջինիս խոսքով՝ հանրությունը մերժում էր այդ թեկնածուների առաջադրումը։ Նրանցից մեկն ակնհայտ կոռումպացված, Քոչարյանի պատվերները կատարողն է, Ա1+ փակողը։ Տրամաբանությունից դուրս է երեկվա կատարվածը։ Բանախոսի պնդմամբ՝ խոսակցություններ են պտտվում, որ երեկ կանչել են պատգամավորներին և ստիպել են քվեարկել այդ թեկնածուների օգտին։ «Դատաիրավական բարեփոխումները չեն լինելու և սա վերջին ապացույցն էր»,- ասաց տիկին Ալեքսանյանը՝ նշելով, որ ոչ մի հավատ այլևս չունի իշխող քաղաքական թիմի նկատմամբ։
Երևանի մամուլի ակումբի նախագահ Բորիս Նավասարդյանն անդրադարձավ իր համացանցային գրառմանը. «Եթե իշանություններն անընդհատ կատարում են քայլեր, որոնք իրենց ընտրողներին կրճատում են, ապա դա նշանակում է, որ առաջիկա ընտրությունների վերաբերյալ այլ նպատակներ ունեն։ Առիթներ են տալիս, որ նախկին ընտրողները այլևս չընտրեն իրենց։ Կա՛մ ուզում են հրաժարվել իշխանությունից հաջորդ ընտրության ժամանակ, կա՛մ պատրաստվում են կեղծել այդ ընտրությունները, կա՛մ այդքան հեռու չեն մտածում և վայելում են ներկան։ Անկախ նրանից, թե այս երեք տարբերակներից որն է իրականությանը համապատասխանում, դա նշանակում է, որ մինչև հաջորդ ընտրություններ մենք կունենանք իշխանություններ, որոնք չեն փորձելու բավարարել այն ակնկալիքները, որոնք կան հանրության մեջ և դրա շնորհիվ ստանան այն ձայները, որ ունեին 1,5 տարի առաջ»։
Նավասարդյանը ընդգծեց, որ երեկվա շատ հուզական արձագանքները վկայում են այն մասին, որ եթե նույնիսկ մինչև երեկ կային մարդիկ՝ փորձագետներ, քաղհասարակության ներկայացուցիչներ, որոնք հույս ունեին, որ հեղափոխությունից հետո ակնկալիքները կարդարացվեն, արդեն այդ պատրանքները չունեն։ Այդ սպասելիքները ետ բերելու համար իշխանությունները շատ կտրուկ փոփոխություններ պետք է անեն իրենց վարքագծի, իրենց ռազմավարության և մարտավարության մեջ։
Երեք ՍԴ դատավորների մասով Նավասարդյանը նկատեց, որ մոտ մեկ տարի առաջ Սահմանադրական դատարանը հայտարարվել էր հեղափոխության հիմնական դիմադրության բաստիոնը, Հրայր Թովմասյանն էլ ներկայացվում էր որպես հիմնական չարիք։ Ենթադրվում էր, որ այդ բաստիոնը վերացնելու համար շատ լուրջ և հետևողական քայլեր էին պետք։ Արդյունքում՝ Հրայր Թովմասյանը մնում է ՍԴ դատավոր, և դրված խնդիրը չի լուծվել։ «Հասանք մի մոդելի, ըստ որի ոչ մի բան չի փոխվում»,- փաստեց բանախոսը։
«Հելսինկյան ասոցացիա» ՀԿ նախագահ Նինա Կարապետյանցը չի կիսում այն տեսակետը, որ այս Սահմանադրական դատարանը դարձավ գրպանային նոր իշխանությունների համար։ Ոչինչ չի հուշում, որ ՍԴ-ն այս կազմով ենթարկվելու է ներկայիս իշխանություններին։ Հին կադրերը փոխարինվեցին շատ ավելի վատ կադրերով։ Այս իշխանություններին չի ծառայելու որևէ մեկը՝ Դատախազությունը, Ոստիկանությունը, Սահմանադրական դատարանը։ Բոլոր գործողություններն ուղղված են այս իշխանություններին տապալելուն, վարկաբեկելուն, եթե այս իշխանությունները գործարքի մեջ չեն նախկին իշխանությունների հետ։ «Հեղափոխությունը բոլորս լուրջ էինք ընդունել, ենթանդրում էինք, որ մեծ փոփոխություններ են լինելու, քանի որ նման լեգիտիմություն ունեցող իշխանություն մենք դեռ չէինք ունեցել»,- եզրափակեց Կարապետյանցը։
Քրիստինե Հովսեփյան
