«Հայաստանը շատ հետևողական է իր մոտեցումներում խաղաղ գործընթացի վերաբերյալ։ Մենք առավել քան հստակ ընդգծել ենք, որ խաղաղ գործընթացը այլընտրանք չունի, որ կարգավորումը հնարավոր է միայն խաղաղ ճանապարհով։ Այդ ամենը մենք ասում ենք բացարձակ այն ինքնավստահության վրա, որ Հայաստանն ու Արցախն ամբողջովին հզոր են պաշտպանելու իրենց, պաշտպանելու իրենց շահերը, սահմանները, և մենք մնում ենք բացարձակ հավատարիմ խաղաղ կարգավորմանը։ Այդ տրմաբանության մեջ է, որ մենք առավել քան պատրաստ ենք եղել և մնում խաղաղ գործընթացի շարունակությանը,-լրագրողների հետ զրույցում հայտարարեց ԱԳ նախարար Զոհրաբ Մնացականյանը՝ նշելով, որ շարունակելու են այն աշխատանքը, որ հայկական կողմը կատարել է այս ամբողջ շրջանում։
Բանակցությունների սեղան վերադառնալու առումով Մնացականյանը նշում է, որ հայկական կողմից կա հստակություն, ադրբեջանական կողմի մասով՝ ոչինչ չի կարող պատասխանել։ Այս շրջանում համանախագահների հետ խորհրդակցություններ են ընթանում, Հայաստանը պատրաստ է վերադառնալ բանակցություններին։ Իսկ Ադրբեջանի նախագահի վերջին հայտարարությունները նախարարն անվանեց հուզական և թողեց առանց մեկնաբանությունների։
Քրիստինե Հովսեփյան
