Ռուսական «Դոսյե» կենտրոնի կողմից հրապարակված զեկույցն ամբողջությամբ ենթադրում է հանցագործության մասին հաղորդում՝ այսպիսի հայտարարություն արեց ԱԱԾ տնօրեն Արգիշտի Քյարամյանը «Եռաբլուր» զինվորական պանթեոնում։ Հրապարակման մեջ զետեղված տեղեկությունների վերաբերյալ ԱԱԾ-ում ուսումնասիրությունները արդեն սկսվել են, սակայն Քյարամյանը դեռևս այլ մանրամասներ հայտնել չի կարող։
Հանրության կողմից լյուստրացիայի պահանջների մասով Քյարամյանը հստակեցրեց, որ ԱԱծ-ում կան բազմաթիվ պատվախնդիր սպաներ, ովքեր իրենց աշխատանքը կատարում են «ի բարօրություն Հայաստան աշխարհի», բայց, բնականաբար, կան անձինք, ովքեր, բնականոն պրոցեսի ընթացքում, պետք է լքեն Ազգային անվտանգության ծառայության շարքերը։
«Էտ պրոցեսը սկսվել է։ Ես կուզենայի, որ նաև ճիշտ ընկալվի իմ ասածը։ Դա բնականոն գործընթաց է՝ մարդիկ գալիս են, մարդիկ գնում են և էստեղ որևէ արտառոց այլ միտք փնտրել տեղին չէ»,- ասաց ԱԱԾ տնօրենը։
Քյարամյանի խոսքով՝ ԱԱԾ-ն շատ լավ գործընկերային հարաբերություններ ունի Ռուսաստանի Դաշնության իր գործընկերների հետ, ինչպես նաև այլ պետությունների հատուկ ծառայությունների հետ, սակայն ՀՀ Ազգային անվտանգության ծառայությունը միտված է, առաջին հերթին, պաշտպանելու ՀՀ ազգային անվտանգությունը, մեր ժողովրդի և պետության շահը։
ԱԱԾ նախկին տնօրեն Արթուր Վանեցյանի հայտարարություններին Արգիշտի Քյարամյանը հակված չէ հակադարձումներ անել մեկնաբանությունների տեսքով, բայց ակնարկեց, որ «Վանեցյանը պետք է մտածի այն հարցի շուրջ, որ իր ԱԱԾ տնօրեն եղած ժամանակահատվածում Ազգային անվտանգության ծառայության, Հատուկ քննչական ծառայության և վարչապետի հեռախոսազրույցները գաղտնալսվել են»։
Քրիստինե Հովսեփյան
