«Եվրամիությունը մեր հիմնական գործընկերն է, և շատ կարևոր է արձանագրել, որ այդ գործընկերությունը շատ բնականոն ընթացքով առաջ է գնում»,- կառավարության նիստում շեշտադրում կատարեց վարչապետ Նիկոլ Փաշինյանը, այնուհետև անդրադարձավ Ռուսաստանում 2020 թվականի մայիսին ռուսական վերլուծական կենտրոններից՝ «ՑԱՍՏ»-ի «Ռուսաստանի դաշնակիցներ» թեմայով հրապարակմանը, որում համապարփակ գնահատական է տրված Ռուսաստանի և ՀԱՊԿ անդամ երկրների դաշնակցային հարաբերություններին։
«Հայաստանին տրված է շատ բարձր մակարդակ՝ դաշնակցային հարաբերությունների կոնտեքստում»,- վարչապետի միտքն ավարտեց Անվտանգության խորհրդի քարտուղար Արմեն Գրիգորյանը։
Նիկոլ Փաշինյանը ընդգծեց նաև՝ առաջիկայում ԱՄՆ-ի հետ կկայանա ռազմավարական երկխոսության երկրորդ փուլը, և ինքը լիահույս է, որ համավարակը չի խոչընդոտի երկխոսության կայացմանը։
«Մենք մեր գործընկերների հետ, գուցե ոչ սովորական, բայց շատ արդյունավետ հարաբերություններ ենք զարգացնում, և մենք շարունակելու ենք այդ հարաբերությունները զարգացնել»,- ասաց Փաշինյանը՝ կրկին նշելով, որ Եվրամիությունը, Ռուսաստանը և Ամերիկայի Միացյալ Նահանգները Հայաստանի համար շատ կարևոր գործընկերներ են, ինչպես նաև հիշատակեց Իրանի և Վրաստանի հետ եղած բարեկամական հարաբերությունները։
Վերջինիս խոսքով՝ «արտաքին քաղաքականության մասին մեր պատկերացումները չեն փոխվել», «շարունակվելու է մեր քաղաքական ուղեգիծը», «գործընկերների հետ հարաբերությունները խորացնելու ենք»՝ չնայած եղած «որոշակի նյուանսներին, որոնք գուցե թե սովորական չեն»։
Քրիստինե Հովսեփյան
