ՀՀ արդարադատության նախարար Ռուստամ Բադասյանն այսօր մանրամասներ է ներկայացրել Եվրոպական միության կողմից Հայաստանին 30 մլն եվրո աջակցություն տրամադրելու մասին:
«Այսօր Կառավարության նիստում հայտարարվեց Եվրոպական միության կողմից Հայաստանին 30 մլն եվրո գումարի չափով աջակցություն տրամադրելու մասին՝ ուղղված արդարադատության ոլորտում Հայաստանի բարեփոխումների իրականացմանը։
Նախ ասեմ, որ բյուջետային աջակցության այս համաձայնագիրն աննախադեպ է և՛ իր ծավալով, և՛ իր ձևով։
Սա հաջողություն է և մեկ անգամ ևս ապացուցում է, որ դատաիրավական և հակակոռուպցիոն մեր բարեփոխումները համապատասխանում են միջազգային լավագույն ստանդարտներին, և այդ առումով ունենք միջազգային հանրության աջակցությունը։
Համաձայնագիրն աջակցելու է մեր բարեփոխումներին երեք հիմնական ուղղություններով՝
- դատական համակարգի անկախության, հաշվետվողականության ու բարեվարքության ամրապնդում.
- դատարաններում գործերի քննության արդյունավետության բարձրացում, դատական պրոցեսների ժամկետների կրճատում ու դատավարության մասնակիցների համար գործընթացի պարզեցում.
- հակակոռուպցիոն դատարանի ստեղծման աջակցություն»,- հայտնել է Բադասյանը:
Հիշեցնենք՝ Կառավարության այսօրվա նիստում ներկայացվեց Հայաստանի Հանրապետության և Եվրոպական հանձնաժողովի միջև «Աջակցություն Հայաստանում դատական ոլորտի բարեփոխումների իրականացմանը. Փուլ I» ֆինանսավորման համաձայնագրի ստորագրման առաջարկությանը հավանություն տալու մասին հարցը:
