Պաշտոնավարման հենց սկզբում Երևանի քաղաքապետ Հայկ Մարությանը, տարբեր առիթներով անդրադառնալով ապօրինի շինարարության և հողազավթումների խնդրին, հստակեցրել է իր մոտեցումը՝ ապօրինի կառուցված շինությունները օրենսդրությամբ սահմանված կարգով պետք է ապամոնտաժվեն, իսկ շինարարության ընթացքում գտնվողները՝ կասեցվեն։
Հայտարարելը մի բան է, իսկ ընդունված որոշումը՝ մեկ այլ, որն անարձագանք չմնաց նախկին պատգամավոր Սամվել Ալեքսանյանի կողմից։ Վերջինս դատական հայց է ներկայացրել ընդդեմ Երևանի քաղաքապետարանի՝ պահանջելով անվավեր ճանաչել քաղաքապետի որոշումը։
Ըստ Երևանի ավագանու «Իմ քայլը» խմբակցության անդամ Գայանե Մելքոմ Մելքոմյանի գրառման՝ տարիներ առաջ Սամվել Ալեքսանյանն ապօրինի շինություններ է կառուցել՝ «զավթելով Դալմայի այգիների պահպանվող տարածքում ներառված մոտ 9 հա անտառային նշանակության պետական հողեր»։
Հատկանշական է, որ կանաչ զանգվածների մասով Հայկ Մարությանը նույնպես խոսել է դեռևս Երևանի քաղաքապետի ընտրությունների քարոզարշավի շրջանակներում՝ ներառելով այն նախընտրական խոստումների իր տեսլականում։ Վերջինս բազմիցս շեշտել է, որ մայրաքաղաքի բնապահպանական վիճակը բարելավելու և երևանցիներին այգիները վերադարձնելու նպատակով նախատեսվում է բարեկարգել և ընդլայնել հանրային կանաչ տարածքները։
Դրույթը նաև տեղ է գտել Երևանի զարգացման հնգամյա ծրագրում, որի իրականացման ուղղությամբ միգուցե մեր ակնկալածից դանդաղ, բայց հետևողականորեն աշխատում է քաղաքապետարանը (հաշվետվողական հոլովակները վկայում են, որ վերջին 1,5 տարում բարեկարգման, կանաչապատման ուղղությամբ ավելի մեծ ծավալի աշխատանքներ են իրականացվել, քան դրան նախորդող մի քանի տարում)։
Այսօր, երբ հարց է առաջացել՝ քանդել ապօրինի շինությունները, թե՞ օտարել պետության սեփականություն հանդիսացող անտառային նշանակության հողակտորը, հասարակությունը պետք է կողմնորոշվի՝ ցանկանում է շարունակել ապրել նախկին իրականության մեջ, որտեղ օրենքը չէր գործում ընտրյալների համար, թե՞ նախընտրում է ցավոտ, բայց առողջացնող «վիրահատությունների» արդյունքում կառուցել իրավահենք պետություն։
Քրիստինե Հովսեփյան
