«Մեր ամբողջ դիվանագիտական ծառայությունն աշխատում է արտակարգ ռեժիմով։ Երեկ ԱԳ նախարարը հեռախոսազրույցներ է ունեցել մոտ երկու տասնյակ գործընկերների հետ, վարչապետը նույնպես իր մակարդակով իրականացրել է հոռախոսազրույցներ միջազգային գործընկերների հետ, և ես ցանկանում եմ բոլոր լրատվամիջոցներին ասել, որ դրանք պետք չի ընկալել որպես մեկ անգամյա գործողություններ։ Դրանք շարունակական կապ են ամբողջ միջազգային հանրության ներկայացուցիչների հետ՝ ներկայացնելու թե՛ տեղում տիրող իրավիճակը, թե՛ ադրբեջանական ագրեսիայի հետևանքով տարածաշրջանի ապակայունացման ուղղությամբ ձեռնարկվող քայլերը և դրա վտանգները»,- հրավիրված ասուլիսի ընթացքում հայտնեց Աննա Նաղդալյանը։
Վերջինիս խոսքով՝ այս պահի դրությամբ ունենք միջազգային հանրության անվերապահ աջակցությունը, որը դատապարտում է ուժի կիրառումը և տարածաշրջանում խաղաղության և կայունության խաթարմանն ուղղված ջանքերը։
Խոսնակը նշեց՝ ինչպես միշտ, այս անգամ ևս Բաքուն դիմում է նույն գործիքակազմին՝ տարածում է կեղծ լուրեր, բայց հայկական կողմն ունի անհերքելի ապացույցներ, որ ռազմական գործողությունները սանձազերծվել են Ադրբեջանի կողմից։
Աննա Նաղդալյանը, անդրադառնալով ընթացող մարտերին, ընդգծեց երկու առանձնահատկություն՝ նախ Ադրբեջանի նախագահ Իլհամ Ալիևի մակարդակով հրաժարում է եղել բանակցությունների խաղաղ գործընթացից և խնդիր է դրվել հակամարտությունը լուծել ռազմական ճանապարհով, և երկրորդը՝ այս անգամ մենք ականատես ենք լինում Ադրբեջանին ցուցաբերվող թուրքական քաղաքական և ռազմական ուղղակի աջակցություն։
Ադրբեջանցիների հետ միասին կռվում են թուրք փորձագետներ, ովքեր օգտագործում են թուրքական սպառազինություն, կան տվյալներ մարտերում զինյալ ահաբեկիչների ներգրավման մասին։
«100 տարի առաջ հայերի ցեղասպանություն իրականացրած Թուրքիան խրախուսում է Ադրբեջանին նույն ցեղասպան գործողություններն իրականացնել հայ ժողովրդի նկատմամբ նաև Հարավային Կովկասում»,- եզրափակեց Աննա Նաղդալյանը։
Քրիստինե Հովսեփյան
