Թշնամու դեմ մի բռունցք ենք՝ միավորվել ենք հանուն հայրենիքի պաշտպանության և հարատևության։ Համապետական կոնսոլիդացիա է և մի կողմ են թողնվել ներքաղաքական բոլոր խնդիրները։ Մարտի դաշտում հայոց հզոր բանակն է, իսկ թիկուքում՝ բոլորս։ Այդպիսի ազգ ենք մենք՝ անկոտրում ոգով, վտանգի դեմ՝ միատարր։
Մեր դիվանագետների, խորհրդարանական խմբակցությունների, քաղաքական ղեկավարության, վարչապետի և նախագահի ջանքերով աշխարհը դուրս է եկել անտարբերության թմբիրից և սատարում է Հայաստան-Արցախ միասնությանը։
Միջազգային հանրության և լրատվամիջոցների ուշադրությունը սևեռված է Արցախում Ադրբեջանի կողմից սանձազերծված լայնածավալ պատերազմին։ Արդեն կարող ենք համարձակ արձանագրել, որ երեկվա օրը բեկումնային էր, և հայկական դիվանագիտությունը կարողացավ ապացուցել, որ ադրբեջանաթուրքական ուժերը կռվում են ահաբեկիչների գործուն մասնակցությամբ։
Իսկ ահաբեկիչների դեմ առաջնագծում մարտնչում են մեր 18-20-ամյա տղաները՝ Արցախյան առաջին գոյամարտի հերոսների հետ կողք կողքի, ովքեր իրենց փորձով ու գիտելիքներով եկել են սատարելու քաջարի մարտիկներին։
Թիկունքն ամուր են պահում ՀՀ շարքային քաղաքացիները, որ ոտքի են կանգնել՝ վտանգված հայրենիքի սահմանին կռվող զինվորին զորակցելու անբեկանելի վճռականությամբ։ Հարյուրավոր կամավորներ մեկնում են Արցախ՝ համալրելու համար հայրենիքի պաշտպանների շարքերը և կասեցնելու ոսոխի առաջընթացը։
Նպատակը մեկն է՝ հաղթանակ, քանզի ունենք պարտք կատարելու մեր զոհված արծիվների առաջ, որ հավերժի ճամփան բռնեցին հանուն խաղաղության հաստատման և դարավոր թշնամու մեկընդմիշտ պարտության։
Քրիստինե Հովսեփյան
