Հրավիրված ասուլիսում Առողջապահության նախարար Արսեն Թորոսյանը խոսեց հակամարտության լուծման խաղաղ գործընթացի մասին.
«Ղարաբաղյան հակամարտության լուծումը պետք է լինի խաղաղ բանակցային գործընթացի միջոցով։ Հակամարտության լուծման փորձը ռազմական ճանապարհով իր մեջ պարունակում է տարածաշրջանային և գլոբալ անվտանգությունը խարխլելու մեծ պոտենցիալ և դրանով պայմանավորված ես վստահ եմ, տարածաշրջանային աշխարհաքաղաքական կենտրոնները, ռազմավարական գործընկերը՝ Ռուսաստանի Դաշնությունը, որը նաև ԵԱՀԿ ՄԽ համանախագահող երկիր է, մյուս համանախագահները շահագրգռված են և անում են ամեն ինչ խաղաղության վերկանգման և երկարատև լուծման համար։ Նրանք տեսնում են նաև մեր տրամադրվածությունը և մեր բանակի հաջողությունները»։
Նախարարը հայտնեց, որ ՀՀ տեղափոխված բոլոր վիրավորները օգտվում են ամենամեծ առողջապահական փաթեթից։ Նշեց, որ Հայաստան են տեղափոխվել նաև այլ հիվանդություններ ունեցող քաղաքացիներ, որոնց բժշկական ծախսերը նույնպես հոգում է Հայաստանի Հանրապետությունը։
ԱՆ նախարարի խոսքով՝ զինվորների և վիրավորների թիվը պատշաճ ներկայացվում է Պաշտպանության նախարարության կողմից, և իրենց խնդիրը միայն վիրավորներին անհրաժեշտ բժշկական սպասարկումով ապահովելն է։
Բանախոսն ընդգծեց, որ պանդեմիայի շրջանում Ադրբեջանի կողմից սանձազերծվեց ագրեսիա, որը լրացուցիչ բեռ է Հայաստանի առաողջապահական համակարգի համար։ Մինչդեռ միջազգային կառույցների կողմից դեռ շատ վաղուց կոչ էր արվում զերծ մնալ ռազմական սրացումներից։
«Ես ինքս տեսել եմ քանդված շենքեր և շինություններ, որոնք հրետակոծվել, հրթիռակոծվել կամ ռմբակոծվել են արգելված զինատեսակներով, որոնց կիրառության մասին կան հավաքագրված ապացույցներ»,- շեշտեց Թորոսյանը։
Քրիստինե Հովսեփյան
