ՄԻԵԴ-ում Հայաստանի Հանրապետության ներկայացուցիչ Եղիշե Կիրակոսյանը նշում է, որ Մարդու իրավունքների եվրոպական դատարանը Թուրքիայի նկատմամբ միջանկյալ միջոց կիրառելու վերաբերյալ Հայաստանի դիմումը բավարարել է միայն Հայաստանի կողմից ներկայացված ապացույցները գնահատելու հիման վրա:
«Արմենպրես»-ի հաղորդմամբ՝ Կիրակոսյանն այս մասին ասաց հոկտեմբերի 7-ի ասուլիսում:
«Փաստացի մեր ներկայացրած ապացույցների հիման վրա դատարանը փաստել է Թուրքիայի ներգրավվածության հանգամանքը: Դատարանը նման քայլի գնացել է Հայաստանի կողմից ներկայացված ապացույցները գնահատելու հիման վրա, այլ ապացույց չի եղել դատարանի տրամադրության տակ: Ակնհայտ է, որ այս քայլով փաստացի ամրագրվում է, որ Թուրքիայի ներգրավվածության հանգամանք առկա է: Եվ, բնականաբար, կա այդ ներգրավվածությունը չեզոքացնելու ուղղությամբ քայլեր ձեռնարկելու կոչ»,-ասաց Կիրակոսյանը:
Նրա կարծիքով՝ սա կարևոր քայլ է նաև հետագա ընդհանուր գործի տրամաբանության մեջ:
«Իսկ վճռի մասին կարող ենք խոսել, երբ հիմնական գանգատ կներկայացնենք: Ոչ Ադրբեջանի, ոչ Թուրքիայի հետ կապված մենք դեռ հիմնական գանգատ չենք ներկայացրել»,-նշեց Կիրակոսյանը:
Նա կարծում է, որ ՄԻԵԴ-ի այս որոշումը կարող է գործիք հանդիսանալ այլ ԵԽ անդամների համար՝ հղում կատարելու այս որոշմանը և այս որոշումը ֆիքսելով՝ Թուրքիային պահանջ ներկայացնելու համար:
Կիրակոսյանը նաև նշեց, որ ամենօրյա ռեժիմով ՄԻԵԴ են ներկայացնում ապացույցներ՝ Ադրբեջանի կողմից կոնվենցիոն և մարդասիրական իրավունքի կոպտագույն խախտումների վերաբերյալ։
Մանրամասները՝ սկզբնաղբյուրում:
