Ելույթ ունենալով իր ռուսաստանցի պաշտոնակից Սերգեյ Լավրովի հետ բանակցություններին հաջորդած ճեպազրույցում՝ ՀՀ ԱԳ նախարարը մեղադրել է Ադրբեջանին հայության ֆիզիկական բնաջնջմանն ուղղված ցեղասպան քաղաքականության համար: Նա շեշտել է, որ Բաքուն այդ գործողություններն իրականացնում է Թուրքիայի եւ վերջինիս կողմից հավաքագրված միջազգային ահաբեկչական խմբավորումների անմիջական մասնակցությամբ:
«Ադրբեջանը դարձել է Թուրքիայի ազդեցության ընդլայնման հարթակ եւ միջազգային ահաբեկչության օջախ, որը հղի է ահաբեկչության ակտիվության աճով ինչպես բուն տարածաշրջանում, այնպես էլ դրանից դուրս»,- ասել է Զոհրաբ Մնացականյանը:
Հայաստանի արտգործնախարարն ասել է, որ այսօր եւ վաղը Մոսկվայում հանդիպելու է ԵԱՀԿ Մինսկի խմբի համանախագահների հետ: Նա շեշտել է հրադադարի ռեժիմի իրագործումը վերահսկելու վերաբերյալ պայմանավորվածությունների ձեռքբերումը:
«Մենք վաղուց ենք խոսում այդ մասին, եւ ադրբեջանական կողմն է, որ միշտ հրաժարվել է քննարկել վերիֆիկացիոն մեխանիզմները», — հիշեցրել է Մնացականյանը:
Այս կապակցությամբ Սերգեյ Լավրովը նկատել է, որ վերիֆիկացիոն մեխանիզմների կարեւորությունը քննարկվել է Ռուսաստանի նախագահի եւ Հայաստանի եւ Ադրբեջանի ղեկավարների հետ հեռախոսային բանակցությունների ընթացքում, որոնք նախորդել են հոկտեմբերի 9-10-ը կայացած մոսկովյան հանդիպումը:
Սերգեյ Լավրովն ասել է, որ Ռուսաստանը պատրաստ է շարունակել ակտիվ միջնորդական ջանքերը քաղաքական կարգավորման ուղղությամբ թե որպես Մինսկի խմբի համանախագահ, թե ազգային մակարդակով:
«Մեր դիրքորոշումն այն է, որ չի կարելի հետաձգել քաղաքական կարգավորումը», — նշել է Ռուսաստանի արտգործնախարարը:
