Շաբաթ օրը՝ հունիսի 29-ին Peoplemedia.am-ը Գեղարքունիքի մարզում էր։ Հայաստանի ամենամեծ գյուղում՝ Վարդենիկում կայացավ շատ հետաքրքիր և իր բնույթով նախադեպը չունեցող միջոցառում՝ «Ավելուկի փառատոն», որը կազմակերպվել էր գյուղում գործող «Սարերի բարիք» սոցիալական ձեռնարկության և «Համայնքի զարկերակ» հասարակական կազմակերպության կողմից։ Ավելուկը Վարդենիկի խոհանոցային բրենդն է ու հենց այստեղ են օգտագործում ավելուկի բազմաթիվ տեսակներ՝ բազմաթիվ ուտեստների ու ճաշերի մեջ, որոնց մեծամասնության մասին գյուղից դուրս ապրողները պատկերացում չունեն։
Փառատոնի շրջանակներում կայացավ յուրօրինակ ցուցահանդես-տոնավաճառ, որտեղ Վարդենիկի, շրջակա համայքների և ՀՀ մյուս մարզերից հետաքրքիր գործունեությամբ զբաղվող մարդիկ և ձեռներեցները հատուկ տաղավարներում ներկայացրեցին իրենց արտադրանքը և միջոցառման մասնակից հյուրերին ծանոթացրեցին իրենց գործունեությանը։ Միջոցառման պատվավոր հյուրերի շարքում էին ՀՀ վարչապետի տիկին Աննա Հակոբյանը, ՀՀ-ում ԵՄ դեսպանատան ներկայացուցիչներ, ԱԺ պատգամավորներ և տարբեր ՀԿ-ների ղեկավարներ։
