Ադրբեջանի կողմից սանձազերծված լայնածավալ պատերազմը խաթարեց Արցախի բնականոն առօրյան՝ քաղաքացիական բնակավայրերը հայտնվեցին հրթիռակոծության տակ, վտանգվեց խաղաղ բնակիչների կյանքն ու առողջությունը։
Ռազմական գործողությունների ծավալման առաջին իսկ օրերից փակվեցին Արցախի դպրոցները, շուրջօրյա խնամքի հաստատությունների տարեցները տեղափոխվեցին Երևան։ Այս թեմայի շուրջ Թիվ1 լրատվականին տեղեկություններ է տրամադրել ՀՀ աշխատանքի և սոցիալական հարցերի նախարարության մամուլի քարտուղար Սոնա Մարտիրոսյանը։
«Մեր նախարարությունն իրականացրել է Ստեփանակերտի երեխաների և տարեցների շուրջօրյա խնամքի հաստատությունների, այսինքն՝ գիշերօթիկների և ծերանոցների բնակիչների տեղափոխումը Երևան և նրանց հետագա, ժամանակավոր խնամքի իրականացումը մեր հաստատություններում»,– ասաց տիկին Մարտիրոսյանը՝ նշելով, որ բոլոր երեխաների համար ապահովված են անհրաժեշտ պայմաններ, որևէ մեկը դուրս չի մնացել կրթական պրոցեսից, հաճախում են հաստատությանը մոտ գտնվող դպրոցներ։
Տիկին Մարտիրոսյանը հայտնեց, որ Արցախից ժամանակավորապես Հայաստան տեղափոխված քաղաքացիները նաև հոգեբանական օգնություն են ստանում. «Բոլոր հաստատություններում կան հոգեբաններ, ովքեր աշխատում են երեխաների հետ, մենք նաև համագործակցում ենք անհատ հոգեբանների հետ, ովքեր կամավոր սկզբունքով ստանձնում են Արցախից ժամանակավորապես Հայաստան տեղափոխված քաղաքացիներին անհրաժեշտ ծառայություններ մատուցելով»։
Անդրադառնալով Արցախից ժամանող և ժամանակավոր կեցության վայր չունեցող քաղաքացիների խնդրին՝ խոսնակը նկատեց, որ բոլոր նման դեպքերում պետք է պարզապես զանգահարել 114 կամ 117 հեռախոսահամարներով, և նախարարությունը կհոգա բոլոր այդ կարիքները։
«Իսկ այն դեպքում, երբ քաղաքացին ուղղակի ժամանել է գիշերային ժամերին կամ պետք է մի քանի ժամ սպասի՝ մինչև ժամանակավոր կեցավայր տեղափոխվելը, Ներսիսյան 14/1 հասցեում գտնվող Հայորդաց տանը մենք հիմնել ենք Արցախից նոր ժամանող քաղաքացիների կայանման կետ, որտեղ նրանք կարող են հանգստանալ, սնվել, իսկ համապատասխան պետական մարմինների ներկայացուցիչները հենց տեղում կգնահատեն նրանց կարիքները և կհոգան դրանք»,– ամփոփեց Սոնա Մարտիրոսյանը։
Քրիստինե Հովսեփյան
