Այսօր Աժ տարածաշրջանային և եվրասիական հարցերի մշտական հանձնաժողովի նիստում ՀՀ ՄԻՊ Արման Թաթոյանն ասաց, որ մի շարք օմբուդսմաններ նամակներ են ուղարկել իրեն՝ իրենց համերաշխության խոսքը գրելով:
«Նրանք նաև նշել են, որ աջակցում են Հայաստանի մարդու իրավունքների պաշտպանին և առհասարակ Հայաստանում և Արցախում իրականացվող ջանքերին՝ պաշտպանելու քաղաքացիական բնակչությանը»։
Թաթոյանը նկատեց, որ նրանցից մի քանիսը նաև նամակներ են հղել Ադրբեջանի Մարդու իրավունքների պաշտպանին, սակայն վերջինս նենգափոխել է իրականությունը։ «Ի՞նչ է արել նա։ Վերցրել է ամբողջը, հրապարկել է իր կայքում, գրել է, թե այս ինչ այս ինչ օմբուդսմենները աջակցում են Ադրբեջանին Հայաստանի դեմ օկուպացիոն քաղաքականության հարցերում»։
ՄԻՊ-ը նաև նշեց, որ ադրբեջանական կողմը իր զեկույցներում վերցնում է միայն Զինուժի լրագրողների նկարները, ովքեր բնականաբար ունեն համազգեստ և զինված են, նրանց կարգավիճակը բոլորովին այլ է, քան քաղաքացիական լրագրողինը։ «Նրանք ներկայացնում են, որ Հայաստանը իր բոլոր լրագրողներին զինում է և ուղարկում է սահման, որ կռվեն, հետո էլ, երբ վիրավորումներ են ստանում, պատճառաբանում են, թե քաղաքացիական լրագրողներ են։ Սա նույնպես փաստերը նենգափոխող տվյալներ են, որոնց հետ մենք ամեն օր պայքարում ենք, կռիվ ենք տալիս, որ թույլ չտանք որևէ կեղծ տվյալ»։
