Ժամանակավոր Հայաստանում ապաստանած արցախցի կանայք և երեխաները բողոքի ակցիա են իրականացնում ՀՀ-ում ԵՄ գրասենյակի դիմաց։ Նրանք պահանջում են, որ Եվրամիությունը իրավական գնահատական տա կատարվածին։ Նաև պահանջում են, որ Եվրամիությունը պատժամիջոցներ կիրառի Թուրքիայի և Ադրբեջանի նկատմամբ, դատապարտի վերջինների ցեղասպան գործողությունները, հավասարության նշան չդնի հակամարտող կողմերի միջև։
Ակցիայի մասնակից կանայք պահանջում են հանդիպում ԵՄ պատվիրակության ներկայացուցիչներ հետ՝ փոխանցելու համար Արցախի կանանց նամակը։
«Ճանաչեք Արցախը», «Մենք ցանկանում ենք խաղաղություն», «Էրդողան՝ հանցագործ, Ալիև՝ մարդասպան» վանկարկում են Արցախի երեխաները՝ պահանջելով քաղաքակիրթ աշխարհից դուրս գալ անտարբերության թմբիրից, հստակ քայլեր ձեռնարկել և հասցեական հայտարարություններ անել։
«Այս պատերազմում երկու կողմ կա՝ հայեր և ահաբեկիչներ։ Միայն դուք եք ընտրում, թե ում կողմից եք»։
«Սա խաղաղ ցույց է, որով մենք ցանկանում ենք լսելի դարձնել Արցախի մայրերի և երեխաների ձայները։ Մենք չենք կարող հանգիստ լինել, մինչև մեր զավակները չվերադառնան տուն մարտի դաշտից։ Մենք ոչ մի տեղ չենք գնալու, չենք լռելու», – ասում են նախաձեռնության հեղինակները։
Քրիստինե Հովսեփյան
