Ժամանակավոր Հայաստան տեղափոխված արցախահայության համար մշակվում է հատուկ ծրագիր, որը իրականացվում է պետական բյուջեի միջոցներով, սակայն աշխատանք է տարվում նաև միջազգային կազմակերպությունների հետ՝ լրացուցիչ ֆինանսական աջակցություն ներգրավելու համար։ Սանձազերծված պատերազմը նոր իրավիճակ է ստեղծել, ուստի նոր իրավիճակին արձագանքելու մեխանիզմներ են մշակվում, որը շուտով կհրապարակվի։ Լրագրողների հետ զրույցում նշեց նախարար Զարուհի Բաթոյանը։
Վերջինիս խոսքով՝ եթե կան սոցիալական աջակցության կարիք ունեցող ընտանիքներ՝ պայմանավորված պատերազմով, կարող են օգտվել սոցիալական աջակցության եղած ծրագրերից՝ դիմելով իրենց համայնքներին։
Իսկ Արցախից ժամանած քաղաքացիները Հայօրդաց տանը մնում են մեկ գիշեր առավելագույնը, որից հետո ուղղորդվում են հատուկ նախապատրաստված կացարաններ, որոնք կարող են լինել մասնավոր սեկտորի պատկանող, ինչպես նաև կարող են լինել պետական կառույցների ենթակայության տակ գործող կազմակերպություններ։
Նախարարը մանրամասնեց, որ ԱՀ քաղաքացիները կարող են ՀՀ-ում ստանալ իրենց կենսաթոշակները, նաև, եթե նոր է դիմում գրելու անհրաժեշտություն առաջացել, կարող են դիմել սոցիալական ապահովության տարածքային գրասենյակներ։ Ինչ վերաբերում է երեխայի ծննդյան կամ խնամքի նպաստին, այս ուղղությամբ ևս աշխատանքներ իրականացվում են, որ քաղաքացիները ստանան իրենց հասանելիք նպաստը։
Տիկին Բաթոյանը հայտնեց, որ նախարարության միջոցով ֆինանսական աջակցություն չի տրամադրվում Արցախից ժամանած ընտանիքներին, բայց լուծվում են առաջին անհրաժեշտության՝ սնունդի, հագուստի, հիգիենայի պարագաների խնդիրները։ Յուրաքանչյուր անձի հաշվարկով որոշակի զամբյուղ կա մշակված, որի համար իրականացվում են գնումներ համայնքների կողմից, նաև մասնավոր սեկտորը և կամավորական խմբերն են աջակցում գործընթացին։
Քրիստինե Հովսեփյան
