«Վարչական իրավախախտումների վերաբերյալ օրենսգրքում նոր փոփոխությունների արդյունքում Ոստիկանության կողմից ամենօրյա և ամենժամյա մոնիթորինգ է իրականացվում՝ հիմնականում սոցիալական ցանցերի և էլեկտրոնային հրապարակումների հետ կապված։ Այն կոչերը, ուղերձները, որոնք կրում են վարչական իրավախախտումների վերաբերյալ օրենսգրքով նախատեսված հանգամանքներ, միանշանակ, դրանց նկատմամբ ձեռնարկվում են համապատասխան միջոցառումներ»,- ասաց փոխոստիկանապետ Արա Ֆիդանյանը լրագրողների հետ ճեպազրույցում։
Ինչ վերաբերում է իշխանափոխության հետ կապված կոչերին, վերջինս նշեց՝ դրանց ուղղությամբ ևս աշխատանքներ տարվում են, սակայն հիմնականում դրանցով զբաղվում են իրավապահ այլ մարմիններ՝ Գլխավոր դատախազությունը և ԱԱԾ-ն։
Ֆիդանյանի խոսքով՝ հստակ սահմանված է, թե որ գրառումների նկատմամբ պետք է հսկողություն իրականացվի, և որ դեպքերում դրանք ենթակա են տույժերի և հեռացման։ Փոխոստիկանապետը հայտնեց, որ այսօրվա դրությամբ արգելված հրապարակումների թիվը 300-ից ավել է, որոնցից 1/3-ը բաժին է ընկնում լրատվամիջոցներին։ Պաշտոնատար անձինք, համաձայն օրենսգրքի համապատասխան դրույթների, ենթակա չեն տուգանման իրենց հրապարակման համար։
Արա Ֆիդանյանը Վազգեն Մանուկյանի հրապարակման հետ կապված մանրամասներ չհայտնեց, սակայն նկատեց, որ իշխանության հրաժարական պահանջելը պետք է դիտարկել համապատասխան դիսպոզիցիայով։ Եթե հրապարակման մեջ չկան իշխանության բռնի տապալման կոչեր, ապա Քրեական օրենսգրքով որևէ գործողություն իրականացնել հնարավոր չէ։
Քրիստինե Հովսեփյան
