ՊԵԿ նախագահ Էդվարդ Հովհաննիսյանը լրագրողների հետ զրույցում, ինչպես ինքը նկատեց «ստիպված», բայցև հերթական անգամ ադրադարձավ պարգևավճարների այդքան քննարկված թեմային։
«Պարգևավճարների վրա այդքան կենտրոնանալը, իմ կարծիքով, եթե նպատակ եք հետապնդում վերացնել այդ պարգևավճարները, ապա դա ոչ մի տեղ չտանող ճանապարհ է։ Բազմաթիվ անգամ մեկնաբանություններ եղել են՝ դրանք վարձատրության համապատասխան համարժեք վարձատրության ուղղված միջոցներ են այս պահին, և պարգևավճարները պետք է լինեն»,- ասաց ՊԵԿ նախագահը։
Վերջինիս խոսքով՝ պատերազմական հենց առաջին օրերից ՊԵԿ աշխատակիցներն այս մասով շատ ակտիվ են եղել, գումարներ են հավաքագրել և փոխանցել Հայաստանի համահայկական հիմնադրամին և Զինվորների ապահովագրության հիմնադրամին։ Այս պահի դրությամբ շուրջ 530 միլիոն դրամ է փոխանցվել հիմնադրամներին։
Հովհաննիսյանը նշեց, որ հոկտեմբերին պարգևավճարներ տրվել են ՊԵԿ աշխատակիցներին, սակայն գումարը ծառայեցվել է վերը նշյալ նախաձեռնությանը, որին մասնակցել են բոլորն անխտիր։ Նոյեմբերին պարգևավճարներ չեն նախատեսվում։
Քրիստինե Հովսեփյան
