Մոտ 150 քննիչներ կամավորագրվել են Արցախ մեկնելու համար, ովքեր անցել են տեսական և գործնական վարժանքներ։ Քննչական կոմիտեի առաջին վաշտը մեկնել է ՔԿ նախագահ Գրիգորյանի ղեկավարությամբ, մյուս վաշտն էլ շուտով կմեկնի։ Այս մասին լրագրողների հետ զրույցում ասաց ՔԿ նախագահի տեղակալ Արթուր Մելիքյանը։
Նրա խոսքով՝ Կոմիտեի աշխատանքը բնականոն շարունակվում է, որոշ քննիչներ կավարտեն իրենց աշխատանքները, որից հետո միայն կմեկնեն առաջնագիծ։ Հնարավոր է որոշակի աշխատանքի դանդաղում, բայց խնդիրը համընդհանուր է։
Մելիքյանը նշեց, որ վարձկան-ահաբեկիչների մասով Քննչական կոմիտեում քննվող քրեական գործերի նշանակությունը շատ մեծ է ինչպես քաղաքական, այնպես էլ իրավական առումով, այս գործի ամբողջական արդյունքները՝ ձեռք բերված ապացույցները, կօգտագործվեն քաղաքական և իրավական հարթակներում։
Համագործակցված, սերտ աշխատանքներ են տարվում Ազգային անվտանգության ծառայության հետ, նախատեսվում է նաև համագործակցել այլ երկրների համապատասխան մարմինների հետ։ Այս պահին քննվող գործով ներգրավված են 2 վարձկան, ապացույցների ձեռք բերման ակտիվ փուլն է ընթանում։
Իսկ դասալքության հետ կապված կան որոշ գործեր, սակայն, Մելիքյանի հավաստմամբ, ահագնացող վտանգ չկա։ Ընդ որում՝ կանոնավոր Բանակում դասալիքներ չկան, գործերը հիմնականում կապված են պահեստազորայինների հետ։
ՔԿ տեղակալը հայտնեց՝ առանձին անհատների կողմից Արցախից Հայաստան զենքի տեղափոխման հետ կապված երեկվա դրությամբ 9 քրեական գործ է հարուցվել։ Կան մեղադրյալներ, որոնց նկատմամբ խափանման տարբեր միջոցներ են կիրառվում։
Քրիստինե Հովսեփյան
