«Դեռևս կա Քարվաճառը պահպանելու հնարավորություն, ուստի մեզանից կախվածը պետք է անենք դրա համար։ Քարվաճառն անառիկ պահող զինվորը պետք է տեսնի, որ ժողովուրդը կանգնած է իր թիկունքին և աջակցում է իրեն։ Աշխարհը պետք է տեսնի, որ մենք չենք հրաժարվում Քարվաճառից և ձգտում ենք պահպանել մեր լեռնային ամրոցը»,- համացանցում գրառում է կատարել Ժիրայր Սեֆիլյանը՝ առաջարկելով բոլոր ցանկացողներին միանալ Սասնա ծռերի նախաձեռնած ավտոերթին։
Ստորագրված համաձայնագրի պարտավորությունները մեղմելու տարբերակներ և ելքեր փնտրելը, իհարկե, անհրաժեշտություն է, սակայն պետք չէ մոռանալ, որ մինչ այդ մեր Բանակը՝ համալրված պահեստազորայիններով և աշխարհազորայիններով, մարտնչել է 45 օր։ Եվ մենք չենք կարող անտեսել, որ մեր տղաները կռվել են 45 օր և դիմակայել են թշնամական՝ մի քանի անգամ մեզ գերազանցող ուժերին։ Կռվել են արժանապատիվ, բայց պատերազմի մի հատվածում հակառակորդը գերազանցել է մեզ։ Էլ ավելի մի՛ նսեմացրեք իրողությունը։
Արդար լինելու համար պետք է հիշատակել, որ Ազգային-ժողովրդական բևեռը մասնակցել է մարտական գործողություններին՝ քանի՞ օր՝ չեմ կարող ասել։ Հիմա նշվում է, որ քաղաքական ուժը հաղթելու ելքեր է առաջարկել, և դա ամրագրված է Facebook-յան գրառումներում, որն անհերքելի է։ Առաջարկվում էր թշնամու օդային գերակայությունը չեզոքացնելու համար «ոչ թռիչքային դարձնել» պատերազմական գոտին, հակառակ դեպքում կորուստերը շարունակվելու են։
Հնչող առաջարկությունը միջոց էր, բայց թե ուշացած էր, թե՝ անհնարին և անիրատեսական մեր սահմանափակ հնարավորություններով։ Ուստի այլընտրանքը միայն կռվելն էր՝ մահն աչքի առաջ իմանալով։ Արդյո՞ք կհաղթեինք անձնազոհ կռվով և գրեթե վերջացած զենքով, նույնիսկ անտեսելով աշխարհաքաղաքական իրողությունները, հետևություններ արեք ինքներդ, բայց նաև զերծ մնացեք վտանգավոր նախաձեռնություններից, որոնք կվտանգեն ոչ միայն 45 օր կռված տղաների կյանքը, այլև այն մի կտոր հողը, որ պահպանել են մեր քաջերը իրենց անձնազոհության շնորհիվ։
Քրիստինե Հովսեփյան
