«Որոշումս վաղուց եմ կայացրել, որպեսզի զորացրվեմ բանակից դեռ հոկտեմբերի 5-ին։ Եվ դրա հիմքը եղել է, այն ժամանակ զեկուցագիր չեմ գրել զորացրվելու, որովհետև հաշվի եմ առել, որ պատերազմի ընթացքում իմ որոշումը վնաս է հասցնելու Զինված ուժերին և որոշել եմ սպասել մինչև պատերազմի ավարտը։ Չնայած այդ ընթացքում ես որոշումը կայացրել եմ, բայց շարունակել եմ, իմ հնարավորության սահմանում, աջակցել բանակին իմ խորհուրդներով, ինչպես նաև ոչ անմիջական, բայց միջնորդավորված ռազմաքաղաքական իշխանությանը։ Որոշումս վերջնական կայացրել եմ ՀՀ վարչապետի գիշերվա լայվից հետո, երբ կոչ արեց կռվող տղաներին վերադառնալ հրապարակ և «վնգստացողներին» դուրս մղել հրապարակից»,- հրավիրված ասուլիսի ժամանակ ասաց ՀՀ ՊՆ ռազմական վերահսկողական ծառայության արդեն նախկին պետ, ԳՇ նախկին պետ Մովսես Հակոբյանը։
Վերջինս նշեց՝ չի խոսել մի պարզ պատճառով՝ այս ընթացքում զինվորականներին չի թույլատրվում որևէ լրատվամիջոցի հարցազրույց կամ մեկնաբանություն տալ և չի արձագանքել իր մասին եղած հրապարակումներին։ Հակոբյանը շեշտեց, որ սուտը, ստի տարածումն այս ընթացքում քայքայել է մեր երկիրը։
«Ես չեմ ուզում մեղավորներ փնտրել, պարզապես մեր երկիրը կանգնած է ճգնաժամի առաջ, և ես ուզում եմ այս միջոցով ազդել, հասարակությանը և ղեկավարությանը հասցնել իմ խոսքը։ Զինված ուժերում կա ինֆորմացիոն կենտրոն, որի խնդիրներից մեկն է հակառակորդին մոլորեցնելը, սուտ ինֆորմացիա տարածելը։ Բայց կա չափանիշ, որ սուտը չպետք է գերազանցի ճիշտ ինֆորմացիայի 30 տոկոսը։ Մեր սուտը գերազանցել է 100 տոկոսը, որը ընկալելի չէ»,- նկատեց զինվորականը՝ հավելելով, որ պատերազմին մասնակցած զինվորները հարցազրույցներ են տալիս, որոնք չեն տիրապետում իրավիճակին։ Ավելին՝ այն մարդիկ, ովքեր կռվել են, չեն խոսում։
Հակոբյանը փաստեց՝ բանակը կռվելու արվեստ է սովորեցնում։ Իսկ կռվելը արվեստ է, արհեստ չէ։ Մեր Կանոնավոր բանակը չի նահանջել, կամ շատ քիչ է նահանջել։ Նահանջել ենք այն վայրերում, որտեղ կամավորներ են կռվել, որոնք գնացել են պատերազմ, բայց չունեն այնքան ունակություններ, որ կարողանան պատերազմ հաղթել։
«Պարտությունը կործանում չի, պարտությունը նոր հաղթանակ կերտելու հնարավորություն է։ Միայն պետք է ճիշտ գնահատես և ճիշտ հետևություններ կատարես։ Պարտության առաջին մեծ պատճառը ղեկավարումն է։ Մեր բոլոր անհաջողությունները սկսել են ԶՈՒ-ի՝ պատերազմի նախապատրաստումից։
Նախկինների ու ներկաների մասին շահարկումներից խուսափեց Հակոբյանը, քանի որ ինքը զինվորական է, խոսեց բացառապես թվերով և մասնագիտորեն։ Վերջինս նշեց, որ վարչապետը 5-օրյա ժամկետում է հիմնավորել իր ազատման դիմումը, այնուհետև նշանակել է Գլխավոր շտաբի պետ Արտակ Դավթյանին՝ «ամենից անպատրաստ գեներալին», որից հետո սկսվել է «Բանակի քանդման գործընթացը»։ Եվ պարտությունն անգրագիտության, կռվելու արվեստին չտիրապետելու արդյունք է։ Մովսես Հակոբյանը ներկայացրեց մանրամասներ կատարված «բարեփոխումներից», որոնք էլ հանգեցրել են այսօրվա իրավիճակին։ Սխալներ են թույլ տվել ոչ միայն քաղաքական իշխանությունները, այլ նաև զինվորականները։
Քրիստինե Հովսեփյան
