Մեկնարկել է արվեստագետների կողմից կազմակերպված ակցիան։ Նրանք միավորվել են, որպեսզի լսելի դարձնեն այն ծնողների և ընտանիքների ձայնը, որոնց ընտանիքի անդամները և զավակները այսօր գերության մեջ են կամ անհետ կորած են համարվում։
Այսօր հանրահավաքի հարթակում ելույթով հանդես չեն գալիս քաղաքական գործիչներ, չի հիշատակվում վարչապետ Նիկոլ Փաշինյանի անունը՝ խուսափելու համար կրիտիկական պահին շահարկումներից և մեդիագրոհներից։
Նպատակը մեկն է՝ վերադարձնել գերիներին և անմահացած հերոսների մարմինները՝ արժանապատիվ կերպով հողին հանձնելու համար։
Դերասան Հրանտ Թոխատյանը երախտագիտություն հայտնեց Արման Թաթոյանին՝ այս օրերին կատարած ահռելի աշխատանքի համար։ Վերջինս խնդրեց համայն հայությանը ձեռքերը ծալած չնստել՝ գրել նամակներ, դիմել այն երկրների կառավարություններին, որտեղ այս պահին բնակվում են, «աշխարհի առաջ պահանջ դնել», քանի որ վաղը կարող է ուշ լինել։
«Դիմում եմ հայերին՝ Հայաստանի և Հայաստանից դուրս, այլ ազգի ներկայացուցիչներին, պետք է վերադարձնել մեր զինվորներին, որոնք դեռևս գտնվում են թշնամու տարածքում, մեր գերիներին և զոհվածների մարմինները»,- հայտարարեց դերասանը։
Բոլորի խոսքում կարմիր թելի պես անցնում էր՝ բարձրացնենք մեր ձայնը, միավորվենք, լուծենք մեր տղաների հարցը, սկսենք այսօրվանից, քանի որ թանկ է ամեն մի րոպեն։
Քրիստինե Հովսեփյան