Աշոտ Ղազարյանը միացել է մտավորականների՝ ռազմագերիների շուտափույթ վերադարձի համար կազմակերպված երթին։ Կարծում է, որ յուրաքանչյուրը պետք է մասնակցություն ցուցաբերի ակցիաններին՝ անհետ կորած մարտիկների և գերության մեջ հայտնված զինվորների հարցը մեկ օր շուտ լուծելու համար։
Ասաց՝ աշխատում է, նկարահանվում, բայց «ներսը վառվում է», դաժան է իրականությունը։ Իսկ իշխանությունների հասցեին գնահատականներ հնչեցնել չի ցանկանում, 71 տարեկան է, այսքան տարվա մեջ ոչ մի անգամ քաղաքական որևէ ելույթ չի հնչեցրել, ոչ մի քաղաքական գործընթացի չի մասնակցել։ «Քաղաքականություն հա՛մ չի սիրում, հա՛մ չի հասկանում»։ Սա ճիշտ, էմոցիոնալ շարժում է, որին սիրով մասնակցում է՝ մի բան արած լինելու մեծ ցանկությամբ։
«Էս, ինչ որ անում ենք, քաղաքական ոչ մի բան չի կրում, իմաստ չունի։ Մերը երեխեքի հետ է կապված, անհետ կորածների հետ է կապված։ Ի՞նչ ասեմ, իշխանությունը պիտի անի, շատ բան պիտի անի, դե հիմա էտ մարդիկ լռում են, գոնե մենք մի բան անենք, ինչ-որ բան պիտի շարժենք»,- լրագրողների հետ զրույցում նշեց սիրված դերասանը։
Քրիստինե Հովսեփյան
