ՍԱՏՄ ղեկավար Գեորգի Ավետիսյանն ասուլիսում ներկայացրեց պատերազմական ժամանակահատվում Արցախից Հայաստան կենդանիների և մսեղիքի տեղափոխման կազմակերպչական մանրամասները։
Վերջինիս խոսքով՝ հոկտեմբերի 11-ից սկսած հրավիրվել են անասնաբույժ-մասնագետներ, ստղեծվել են աշխատանքային խմբեր՝ տարբեր ոլորտների լավագույն մասնագետների ներգրավմամբ, համագործակցել են Էկոնոմիկայի նախարարության, Ոստիկանության և Սյունիքի մարզպետարանի հետ, այնուհետև կազմվել է աշխատանքային պլան՝ հաշվի առնելով, որ տեղափոխվող կենդանիները կարող էին հիվանդ լինել տարբեր կենսաբանական դիվերսիաների հետևանքով։
Ճանապարհային անցակետերում մասնագետները իրականացրել են հետազոտություն, թե ինչ կենդանիներ են գալիս և ուր են տեղափոխվում, իսկ արդեն վերջին կետում կատարվել են օպերատիվ անասնաբուժական հետազոտություններ, ինչի արդյունքում բնակչությունը զերծ է մնացել անասնահամաճարակներից։ Այս պահին չկան հիվանդ կենդանիներ։ Միջոցառումները շարունակվում են, կենդանիները ստանում են բոլոր անհրաժեշտ պատվաստումները։
ՍԱՏՄ ղեկավարը փաստեց՝ շուրջ 10 000 գլուխ կենդանի Արցախից տեղափոխվել է Հայաստան, որից 4500-ը խոշոր եղջերավոր կենդանիներ են, մոտ 5000-ը մանր եղջերավոր կենդանիներ են, նաև՝ 140 խոզ և 60 ձի։ Թվաքանակի առումով դեռ ճշտումներ են կատարվում՝ պարզելու համար, թե արդյո՞ք կան տեղափոխված այլ կենդանիներ, որոնք բերվել են սարերով և դաշտերով, մեքենաներով չեն տեղափոխվել և վրիպել են կառույցի ուշադրությունից։
Ավետիսյանը նշեց, որ իրացման ցանցերում մսամթերքի որակի վերահսկման գործողություններ իրականացվում է դեռ հուլիս ամսից՝ սպանդանոցների ներդրմամբ, վերահսկողությունից դուրս են միայն բակային մորթերը։ Ուստի հասարակությանը, մշտապես, կոչ է արվում խուսափել ավտոմեքենաների թափքից կենդանական ծագման սննդամթերքի ձեռք բերումից, որը խիստ վտանգավոր կարող է լինել մարդկային առողջության համար։
Բանախոսը ընդգծեց, որ մոտ 100 000 դրամի չափով տուգանք է կիրառվում այն խանութների նկատմամբ, որոնք վաճառում են չստուգված մսամթերք, և ուրեմն, խանութների սեփականատերերը պետք է հասկանան, որ ավելի լավ է գործել օրենքի սահմաններում։ Նա նկատեց՝ խնդիրը գրեթե լուծված է Երևանում, սակայն դեռ լիարժեք վերահսկողությունից դուրս են մնում գյուղական բնակավայրերը։
Քրիստինե Հովսեփյան
