Կառավարության նիստի ժամանակ նախարար Մեսրոպ Առաքելյանը ներկայացրեց նախագիծ, որը վերաբերում է անհետ կորած զինծառայողների ընտանիքներին աջակցություն տրամադրելուն․
«Այս պահին գործող կարգավորումներով առկա է օրենսդրական ժամանակահատված, համաձայն որի պետք է այդ կարգավիճակը հստակեցվի։ Եվ մինչև այդ կարգավիճակի հստակեցումը առաջարկվում է առավելագույնը 6 ամիս ժամկետով յուրաքանչյուր ամիս 300 հազար դրամ աջակցություն տրամադրել անհետ կորած զինծառայողների ընտանիքններին։ Սույն որոշման իմաստով անհետ կորած են համարվելու Պաշտպանության նախարարության կողմից ներկայացված, իրենց տվյալներում առկա զինծառայողների ընտանիքների վերաբերյալ տեղեկությունների հիման վրա։ Գործընթացը կազմակերպվելու է «Զինծառայողների կյանքին և առողջությանը պատճառված վնասների հատուցման» հիմնադրամի կողմից՝ հաշվի առնելով այն հանգամանքը, որ այդ հիմնադրամն է հետագայում նույնպես այս անձանց՝ օրենքով սահմանված կարգով շահառու դառնալու պարագայում, շարունակելու փոխհատուցումը և աջակցությունը տրամադրվելու է այնքան ժամանակ, մինչև այս անձինք կդառնան շահառու համաձայն գործող օրենքի»։
Նախարարի խոսքով՝ աջակցությունը տրամադրվելու է բյուջեից՝ 500 մլն դրամի չափով, այնուհետև՝ հիմնադրամի կողմից վճարումները կատարելուց հետո, նույն չափով կփոխհատուցվի բյուջեից։
Նիկոլ Փաշինյանը հավելեց, որ կարգավիճակի հաստատումը օրենսդրական կարգավորումներով շատ ավելի երկար ժամանակ է պահանջում, ուստի փորձ է արվել կրճատել ժամկետները։ Բայց, անկախ ամեն ինչից, պրոցեսները տևելու են մի քանի ամիս, այդ պատճառով որոշում է կայացվել բյուջեից գումար փոխանցել հիմնադրամին։ Վարչապետն ընդգծեց, որ շահառուների թվում են նաև գերեվարված զինծառայողները։
Քրիստինե Հովսեփյան
