Տեղեկատվական դաշտում ի թիվս այլ հարցերի՝ շարունակում է խնդրահարույց համարվել ֆեյք օգտատերերի գոյության և նրանց օգտահաշիվներից տարածվող ապատեղեկատվության, հայհոյանքներ և անընդունելի վիրավորական արտահայտություններ պարունակող գրառումների տարածման հարցը։ Ֆեյքերի գործունեությունը ցավալի է ոչ միայն տեղեկատվական հարթակներն աղբով լցնելու տեսակետից, այլ նաև այն պարզ իրողությամբ, որ անգամ անանուն կամ կեղծ անվան տակ գործունեություն են ծավալում մարդիկ, որոնք ևս մեր հասարակության անդամ են, և խոշոր հաշվով՝ հանդիսանում են կոլեկտիվ արժեհամակարգի մասնավոր կրողներ։
Եվ արձանագրելը, որ հայհոյախառն, մարդկանց արժանապատվությունն անհիմն պախարակող և զրոյից ցածր բարոյական և էթիկական նշաձող ունեցող գրառումները ծնվում են մեր կողքին ապրող և իրենց որպես բարոյական չափանիշ մատուցող համաքաղաքացիների կողմից՝ այն էլ կեղծ անվան տակ՝ պարզապես նողկալի է։
Որքան էլ երևույթը համատարած է և չարժե մասնավորեցնել՝ ոչնչություններից ոչ մեկին առանձնահատուկ չարժևորելու համար՝ բայց որպես վերը շարադրվածի վառ օրինակ՝ կարող ենք առանցնացնել «Գագիկ Սողոմոնյան» անունով հանդես եկող կեղծ օգտատիրոջը, ով իր սրբապիղծ գրառումներով վիրավորում է մարդկանց, հայհոյում, հորինում իրականության հետ կապ չունեցող կեղծիքներ։
Իր համացանցային անբարո և հանցավոր արարքների պատճառով այդ օգտատիրոջ տակ քողարկվող մարդն արդեն իրավապահների դիտարկումների տակ է՝ տասնյակ դրվագներով հանցագործությունների հետքերով։ Իրականում ընդհանրապես էական չէ, թե ժամանակակից տեղեկատվական դաշտի և իրավական կարգավորումների չհամադրվող գործիքակազմերը ինչ լուծում գտնեն առաջին հերթին բարոյականության և սրբության սահմաններ չճանաչողների դեմ, էականն այն հասարակական գնահատականն է, որը միանշանակ կապտակի գագիկսողոմոնյաններին:
Լարիսա Դավթյան
