Կորոնավիրուսի հետեւանքով Երեւանում երեկ հղի է մահացել։ Դրանից օրեր առաջ մահացել էր նաեւ պտուղը։
«40-ամյա կինն ունեցել է կորովիրուսային հիվանդություն, թոքաբորբ, ինչպես նաեւ մի շարք ուղեկցող քրոնիկական հիվանդություններ: Պրոգրեսիվող շնչական անբավարարության պատճառով դեկտեմբերի 2-ին տեղափոխվել է վերակենդանացման բաժանմունք: Այդ ընթացքում առողջապահության նախարարության կողմից կազմակերպվել են կրկնակի կոնսիլիումներ հանրապետության առաջատար մասնագետների ներգրավմամբ, սական, չնայած ձեռնարկված համալիր բուժական միջոցառումներին, պացիենտի վիճակը շարունակել է վատանալ»,- «Հայկական ժամանակին» փոխանցեց առողջապահության նախարարի մամուլի խոսնակ Ալինա Նիկողոսյանը:
Նրա տեղեկացմամբ՝ դեկտեմբերի 11-ին արձանագրվել է պտղի մահ, որի կապակցությամբ կյանքի ցուցումով կատարվել է ծննդալուծում կեսարյան հատման միջոցով, որի ընթացքում արձանագրվել է մոր սրտի ռիթմի խանգարում, արյան շրջանառության կանգ, իրականացվել են վերակենդանացման միջոցառումներ, պացիենտը միացվել է թոքերի արհեստական շնճառության սարքին։
«Դեկտեմբերի 13-ին նրա վիճակը կտրուկ վատացել է, եւ, չնայած ողջ ծավալով իրականացված վերակենդանացման միջոցառումներին, արձանագրվել է կենսաբանական մահ»,- ցավով արձանագրեց Նիկողոսյանը։
Կինը հղիության 28-րդ շաբաթում էր։
Սա կորոնավիրուսային հիվանդության հետեւանքով հղիի մահվան առաջին դեպքն է։
Այսօր հրապարակված տվյալներով՝ վարակից մահվան 17 դեպք է գրանցվել։ Եվս մեկ մահ է գրանցվել, երբ պացիենտն ունեցել է կորոնավիրուսային վարակ, սակայն մահը վրա է հասել այլ հիվանդության պատճառով։
