ԻՄ ՔԱՅԼԸ բարեգործական հիմնադրամի «Աղքատության փուլային հաղթահարման» ծրագրի 18 շահառուներ արհեստագործական մասնագիտություն ձեռք բերելու հնարավորություն էին ստացել:
Երեք ամիս շարունակ՝ ս.թ. օգոստոսից նոյեմբեր ամիսներին, ՀՀ տարբեր բնակավայրերից տարբեր տարիքի կանայք մասնակցեցին մատնահարդարման դասընթացների՝ միջազգային որակավորում ունեցող կենտրոնում: Դասընթացի ավարտին՝ քննություն հանձնելուց հետո, նրանք ստացան համապատասխան որակավորման վկայականներ:
Դասընթացի մասնակիցներին Հիմնադրամը հատկացրեց մասնագիտական աշխատանքի համար անհրաժեշտ գործիքներ, նյութեր, որի շնորհիվ նրանք կարողանում են արդեն գումար աշխատել։
Ծրագրի շահառուները գոհունակությամբ նշում են, որ դասընթացի առաջին ամսից մատնահարդարման պատվերների շնորհիվ ունեցել են եկամուտ:
«Հիմնադրամի աջակցությամբ մեր կանայք ստացան սեփական բարեկեցությունն ապահովելու կարողություն, ֆինանսական կայունություն, որի շնորհիվ կդառնան ավելի ինքնաբավ և ինքնուրույն: Սա նրանց համար կյանքի նոր էջ՝ նոր մասնագիտությամբ սկսելու հնարավորություն է», – նշում է Հիմնադրամի սոցիալական դեպքերի համակարգող Զարա Ասլանյանը:
Հիշեցնենք, որ Հիմնադրամն իրականացնում էր «Աղքատության փուլային հաղթահարման» սոցիալական ծրագիրը, որն ուղղված էր վերապատրաստումների միջոցով շահառուների հմտությունների զարգացմանը, սակայն այժմ դադարեցված է։
Այսօր Հիմնադրամը, պայմանավորված պատերազմի հետևանքներով, իրականացնում է բացառապես մարդասիրական ծրագրեր:
