Էջմիածնի զորամասից անհետ կորածների ծնողները այսօր բողոքի ակցիա են իրականացնում Պաշտպանության նախարարության դիմաց։ Արդեն 55 օր շարունակ նրանք, թակելով բոլոր պատկան մարմինների դռները և հանդիպելով համապատասխան պաշտոնատար անձանց հետ, փորձում են որևէ տեղեկություն ստանալ իրենց զավակների մասին։
Երեկ հայրենիք վերադարձած հայ ռազմագերիների մեջ եղել է մեկ էջմիածնեցի զինծառայող, որի համար շատ ուրախ են ակցիայի մասնակիցները և պայքարելու են մնացած 40-ի համար, որոնք եղել են նույն զորամասից։
«Զորամասում եղել են 17 քիմիկներ, 17 ՄՈԲ, 6 հետախույզներ և ավտոբուսի վարորդը։ Ընդհանուր 41 հոգի են, երեկ մեկը վերադարձել է, ու շատ ուրախ ենք իրա համար։ Ամեն դեպքում պետք է պայքարենք մնացած 40-ի համար»,- ասաց անհետ կորածի մայր Անահիտ Ադոյանը։
Ծնողները պատրաստ են մասնակցելու տարվող որոնողական աշխատանքներին, բայց դեռ ոչինչ հայտնի չէ, ուստի սպասում են նախարարության առաջ՝ հուսալով, որ գոնե ԳՇ պետ Օնիկ Գասպարյանը կարող է լուր հայտնել իրենց զավակների ճակատագրի մասին։
Քրիստինե Հովսեփյան
