Ռ. Քոչարյանի աջակիցները հարձակվել են «Առավոտ»-ի լրագրողի վրա, վիրավորանքներ հնչեցրել (տեսանյութ)

«Ես չգիտեմ, թե գործընկերներս ինչ կարծիք ունեն այս երեւույթի մասին, բայց կարծես թե լրագրողների համար գնալով վտանագավոր է դառնում Քոչարյանի աջակիցների ցույցերը լուսաբանելը, «ախրանա» է հարկավոր»:

Այս մասին ֆեյսբուքի իր էջում գրել է «Առավոտ»-ի լրագրող Նելլի Բաբայանը՝ հրապարակելով տեսանյութ:
Հիշեցնենք, որ սա առաջին դեպքը չէ, նախկինում էլ Քոչարյանի աջակիցները մի քանի անգամ հարձակվել են «Ազատություն» ռադիոկայանի լրագրողների վրա:

Տպավորություն է, որ այդ ամենն ուղղորդված է արվում: Նաեւ սոցիալական ցանցերի տիրույթում կազմակերպված «գրոհներ» են իրականացնում առանձին լրագրողների դեմ: Քոչարյանական փոքրիկ թիմն իր ֆեյքերի բանակով ակնհայտորեն թիրախավորել է մերժված ռեժիմի մեդիաթագավորությունից դուրս գտնվող լրատվամիջոցներին:

Հիշեցնենք, Հայաստանում մեդիայի 90 տոկոսից ավելին պատկանում է տապալված ռեժիմին: Այս տիրույթում օր ու գիշեր ապատեղեկատվություն ու իրենց տապալած իշխանությունների, կամ նոր արժեքների ու ցանկացած առողջ բանի դեմ սեւ PR-ի գրոհներ կազմակերպող մերժվածները, որոնք չեն կարողանում ու բնականաբար, չեն էլ կարողանալու հաջողության հասնել, ակնհայտ հարձակումներ են սկսել անկախ լրատվամիջոցների դեմ:

Ձեռագիրը քաջածանոթ է: Նրանց իշխանության ընթացքում միջազգային հեղինակավոր կազմակերպությունների զեկույցներից անպակաս են եղել լրատվամիջոցների ու լրագրողների դեմ ճնշումների ու բռնությունների մասին փաստերը:
Նյութի աղբյուր՝ armtimes.com