ՀՀ վերաքննիչ քրեական դատարանը այսօր վերացրել է Սուրբ Աթոռում ՀՀ նախկին դեսպան, Սերժ Սարգսյանի փեսա Միքայել Մինասյանի նկատմամբ կալանավորումը որպես խափանման միջոց ընտրելու որոշումը։
Այս մասին ֆեյսբուքյան իր էջում գրել է Մինասյանի պաշտպան Միհրան Պողոսյանը։
Հիշեցնենք՝ Միքայել Մինասյանին կալանավորելու որոշումը կայացվել էր սեպտեմբերի 22-ին։ Նա որպես մեղադրյալ է ներգրավված ՊԵԿ քննչական վարչությունում քննվող քրեական գործի շրջանակում ապօրինի հարստացման, փողերի լվացման եւ հայտարարագրում կեղծ տվյալներ ներկայացնելու հոդվածներով: Մինասյանը հետախուզման մեջ է եւ մեղադրանքը քաղաքական հետապնդում է որակում:
Պաշտպան Միհրան Պողոսյանի գրառումը՝ ստորեւ․
«Վերաքննիչ դատարանը քիչ առաջ վերացրեց Սուրբ Աթոռում ՀՀ նախկին դեսպան Միքայել Մինասյանի նկատմամբ ընտրված կալանավորումը։ Շուրջ մեկուկես տարի ձգվող այս քաղաքական-քրեական գործում Հայաստանի վարչապետի պաշտոնը զբաղեցնող անձն արդեն չորրորդ անգամ մատնվում է անհաջողության իր բաղձալի նպատակին հասնելու ճանապահին։ Ցավով պետք է արձանագրեմ, որ եթե Նիկոլ Փաշինյանը Միքայել Մինասյանի նկատմամբ գործ կարելու իր ջանքերի տասը տոկոսն ուղղեր մեր օր օրի փոքրացող հայրենիքի առջև ծառացած արհավիրքները կանխելուն, մեր բոլորիս վիճակն այսօր այդքան ողբալի չէր լինի»,- գրել է նա։
