ՀՀ աշխատանքի և սոցիալական հարցերի նախարարության նոր միջոցառմամբ Արցախի քաղաքացիներին, որոնք բնակվել են Արցախի վերահսկողությունից դուրս գտնվող տարածքներում և հիմա ժամանակավորապես բնակություն են հաստատել ՀՀ-ում, առաջարկվում է աշխատանքային փորձառություն ձեռք բերել մինչև 3 ամիս ժամկետով գործատուների մոտ՝ որպես աշխատանքային պրակտիկա, որի դիմաց քաղաքացիները կվարձատրվեն 100 հազար դրամի չափով՝ առանց հարկերի։ Միևնույն ժամանակ գործատուի մոտ պրակտիկայի գործընթացը կազմակերպող անձին կտրամադրվի 34 000 դրամ վարձատրություն։ Միջոցառմանը մասնակցելու համար քաղաքացիները կարող են դիմել նախարարության զբաղվածության գործակալություններ։ Այս մասին կառավարության նիստի ժամանակ հանգամանալից խոսեց նախարար Մեսրոպ Առաքելյանը։
«Այս ծրագրերը իրենց բնույթով կարճաժամկետ են, խրախուսում են աշխատանքը, քանի որ Արցախ կատարած իմ այցի ժամանակ մեր գործընկերների հետ քննարկել ենք և առաջիկայում Արցախում է նախատեսված ավելի երկարաժամկետ աշխատանքի խրախուսման միջոցառումներ, որը հնարավորություն կտա Արցախի քաղաքացիներին ապահովել կայուն եկամուտով»,- նշեց նախարար Մեսրոպ Առաքելյանը։
Քրիստինե Հովսեփյան
