Այս շաբաթ տեղի ունեցավ գերիների փոխանակման առաջին փուլը, բայց նաև շարունակական աշխատանքներ են տեղի ունենում գերիների տվյալների ճշտման և հետագա փոխանակման քայլերի հետ կապված։ Այս մասին հայտնեց փոխվարչապետ Տիգրան Ավինյանը կառավարության նիստի բացման խոսքում։
Նա նշեց, որ այս առումով բանակցություններ են ընթանում ադրբեջանական կողմի հետ՝ Կարմիր Խաչի և ռուսական կողմի ներգրավածությամբ։ Իսկ Խծաբերդի միջադեպի և հավանաբար գերեվարված անձանց խնդրի հետ կապված մանրամասները ճշտվում են։
«Գլխավոր շտաբի պետ Օնիկ Գասպարյանն այս պահին գտնվում է Արցախում, այս և այլ հարցերի հարցերի կապակցությամբ տեղում լուծումները հասկանալու և քննարկումներ իրականացնելու։ Այս հարցի շուրջ էլ ադրբեջանական կողմի հետ տեղի են ունենում բանակցություններ, և մոտ ապագայում ակնկալում ենք հանգուցալուծում»,- ընդգծեց Ավինյանը։
Վերջինիս խոսքով՝ որոշակի լարվածություն է եղել Հին Շեն համայնքում, այս պահին միջդիրքային կապը առկա է, խնդիրը ամբողջապես հանգուցալուծված չէ, բայց այս հատվածում տեղակայված են ռուս խաղաղապահները։ Ակնկալվում է, որ Հին Շենի հետ կապված մոտ ապագայում կունենանք վերջնական հանգուցալուծում։
Ավինյանը հավելեց, որ այս պահին Սյունիքում է ՊՆ նախարար Վաղարշակ Հարությունյանը․
«Սահմանապահ զորքերը Սյունիքի հետ մեր սահմանների երկայնքով իրականացնում են տեղակայման աշխատանքներ»։
Քրիստինե Հովսեփյան
