Ռուսաստանահայ գործարար Կամո Ավագումյանը դատի է տվել ՀՀ Կառավարությանը եւ Երեւան համայնքին։ Նա դիմել է Վարչական դատարան՝ որոշումն անվավեր ճանաչելու պահանջով։ Այս մասին տեղեկանում ենք դատական տեղեկատվական համակարգից։
Հայցը ներկայացվել է դեկտեմբերի 3-ին եւ մակագրվել Վարչական դատարանի դատավոր Ալեքսանդրա Հարությունյանին։
Ավագումյանի ներկայացուցիչ Գեւորգ Հարությունյանը «Հայկական ժամանակ»-ի հետ զրույցում ասել է, որ իր վստահորդը տարիներ առաջ Հաղթանակի զբոսայգու մոտակայքում հողամաս է ձեռք բերել, որից հետո՝ ե՛ւ 2019-ին ե՛ւ 2020-ին դիմել է քաղաքապետարան շինթույլտվություն ստանալու համար, սակայն մերժվել է։
«Մերժման պատճառաբանությունն այն է, որ 2004 թվականին քաղաքապետի կողմից որոշում է կայացվել, որով այդ հողատարածքի նկատմամբ հատուկ իրավական ռեժիմ է կիրառվել, ինչը ենթադրում է, որ այդտեղ կառուցապատումները սահմանափակված են»,- նշեց Հարությունյանը՝ հավելելով, որ հայցով ցանկանում են առոչինչ ճանաչել այդ որոշումը։
Նրա խոսքով՝ այդ թվականներին Երեւանի քաղաքապետը նմանատիպ որոշում կայացնելու լիազորություն չի ունեցել, մի քանի հիմք ունեն, որոնք ներկայացրել են դատարան։
Հարցին՝ ի՞նչ շինարարություն պետք է ընթանար այդ տարածքում, Հարությունյանը պատասխանեց, որ բնակելի տուն պետք է կառուցվեր․ «Մենք պահանջում ենք, որ այդ որոշումը վերացվի եւ թույլ տան բնակելի տուն կառուցել այդ տարածքում»։
Անդրադառնալով հարցին՝ եթե Երեւանի քաղաքապետարանի հետ է խնդիրը ինչո՞ւ են Կառավարությանը դատի տվել նա նշեց, որ դա իրենց մարտավարական գաղտնիքն է։
