Թեև փորձ էր արվում ներկայացնել, որ Սյունիքում բոլորը դեմ են Նիկոլ Փաշինյանի այցին, բայց այլևս հստակ է, որ առնվազն Սառնակունք գյուղում սյունեցիների մի մեծ խումբ պատրաստ է խոսել վարչապետի հետ, լսել նրա բացատրությունները և մի-մի թասով խմել մեր անմահացած հերոսների հոգու հանգստության կենացը։
Զրույցի ընթացքում հավաքվածները բարձրաձայնեցին տարբեր հարցեր։ Ժողովրդի մտահոգությունները կապված են սահմանների, ճանապարհների անվտանգության հետ՝ ցանկանում են երաշխիքներ ստանալ, որ հետագա տեղաշարժը չի լինի վտանգված։
«Էնպես է ստացվել, որ հիմա մենք աշխատում ենք Խորհրդային Հայաստանի և Խորհրդային Ադրբեջանի վարչական սահմանի երկայնքով, և էնպես է ստացվել, որ ճանապարհը սահմանի պռնկով է անցնում։ Հիմա մեր սահմանապահներն են տեղակայվում էնտեղ, այս ճանապարհը ռուս սահմանապահներն են պարեկելու, ապահովելու են, որ ճանապարհն անցանելի լինի և անվտանգ լինի։ Այս ամենն արվում է նրա համար, որ անվտանգությունն ապահովվի, որպեսզի նոր կոնֆլիկտ չբորբոքվի էտ ամեն ինչի պատճառով։ Մինչև իրավիճակը կայունանալը, էնտեղ կլինեն առանձին դեպքեր, միջադեպեր և այլն, որոնք արդեն հետագա աշխատանքի ընթացքում կկարգավորվեն։ Հիմա կարևոր է, որ մենք ամեն մի առանձին դեպքից խուճապի չմատնվենք, և իրավիճակը կայունացնենք»,- ասաց Նիկոլ Փաշինյանը՝ հավելելով, որ պետք է ժողովրդի հետ միասին հաղթահարեն բոլոր բարդությունները՝ վերադարձնեն գերիներին, փնտրեն անհետ կորածներին։
Քրիստինե Հովսեփյան
