Արցախյան վերջին պատերազմում կամավորագրված Միքայել Միքայելյանը դատի է տվել «Politik.am» կայքի խմբագիր Բորիս Թամոյանին։ Այս մասին տեղեկանում ենք Դատական տեղեկատվական համակարգից։
Միքայելյանը պահանջում է հրապարակայնորեն ներողություն խնդրել եւ փոխհատուցում վճարել։ Հայցը ներկայացվել է դեկտեմբերի 8-ին եւ մակագրվել Երեւան քաղաքի ընդհանուր իրավասության դատարանի դատավոր Էդուարդ Ամալյանին։
ՀԺ-ն Միքայելյանից հետաքրքրվեց, թե ո՞րն է հայցի պատճառը, ի պատասխան՝ վերջինս հայտնեց, որ նոյեմբերի 10-ին՝ եռակողմ հայտարարությունից հետո, գրառում էր կատարել եւ նշել, որ դասալիքներին չի մոռանա։
«Ես նշեցի, որ հոկտեմբերի 1-ին Ջաբրայիլում գոռում էի՝ մի փախեք, մեզ մենակ մի թողեք։ Այնուհետեւ նույն դեպքը Կուբաթլուում էր. մեր աչքի առաջ վարչապետի որդին էր դասալիքներին խնդրում չփախչել։ Այս գրառումը շատ էր տարածվել։ Իմ գրած տեքստից պարզ է, չէ, որ ես 2 տարբեր իրադարձությունների մասին եմ ասում. մի դեպքը հոկտեմբերի 1-ին է տեղի ունեցել, մյուս դեպքը՝ մի քանի օր հետո։ Բորիս Մուրազին (Թամոյան) գրել էր, թե ինչպես կարող էի ես հոկտեմբերի 1-ին վարչապետի որդուն տեսնել, եթե նա կամավորագրվել է հոկտեմբերի 5-ին։ Ինձ այդտեղ սկսեցին անվանել ստախոս, եւ դա լայն տարածում գտավ հակաիշխանակնա մեդիադաշտում։ Նա հրապարակային ինձ ասաց՝ հերթական «չա**ախը», ով պնդում է, որ բոլորը փախել են՝ բացի Աշոտիկից»,- ասաց Միքայելյանը։
Հարցին՝ ի՞նչ է պահանջում՝ Միքայելյանը պատասխանեց. «Պահանջում եմ հրապարակային ներողություն եւ բարոյական փոխհատուցում՝ 500 հազար դրամ եւ փաստաբանի ծառայությունների դիմաց վճար՝ գրեթե 700 հազար դրամ»։
