Իշխող խմբակցությունը լռեցնում է ընդդիմությանը․ Էդմոն Մարուքյան

Դեռևս նոյեմբերի 14-ին «Լուսավոր Հայաստանը» ներկայացրել է ճանապարհային քարտեզ, թե ինչպես երկիրը դուրս բերել ճգնաժամային իրավիճակից։ Քարտեզում շարադրված կետերը, ըստ Էդմոն Մարուքյանի, մնացել են անկատար։ Արդ՝ իրենք պնդում էին՝ երկրի թիվ մեկ բանակցողը պետք է փոխվի, բայց իշխող կուսակցության կողմից այս պնդումը չընդունվեց, արժանացավ քննադատության, իսկ հունվարի 11-ին այդ պնդումը դարձավ իրողություն։

ԱԺ ամբիոնից Մարուքյանը շեշտեց, որ իրենց կողմից հնչեցված հանդուրժողականության, միասնականության կոչերը մնացին անարձագանք, ինչը խոսում է այն մասին, որ իշխող խմբակցությունը դասեր չի քաղել տեղի ունեցածից, շարունակում է նույն ձևով լռեցնել ընդդիմությանը, ավելի շատ լիազորություններ փոխանցելու փոխարեն զրկում են հանձնաժողովի նախագահի պաշտոնից։

Խմբակցության ղեկավարը հորդորեց գործընկերներին կողմ քվեարկել իրենց նախագծին՝  խորհրդարանում քննարկումների սկիզբ դնելու համար, նաև 20 րոպե ընդմիջում խնդրեց՝ «Իմ քայլը» խմբակցության պատգամավորների հետ բանակցելու համար։

Քրիստինե Հովսեփյան