Նավասարդ Սրբազանը վաճառել է իր «Բենթլի» ավտոմեքենան եւ գումարը նվիրել կարիքավորներին: Եռաբլուրում լրագրողների հետ զրույցում այս մասին ասաց Ամենայն հայոց կաթողիկոս Գարեգին Երկրորդը:
Լրագրողների հարցերին ի պատասխան՝ խոսելով երկրում ստեղծված վիճակի մեջ հոգեւորականների մեղքի բաժնի մասին եւ անդրադառնալով կոռուպցիոն բազմաթիվ երեւույթների մեջ նրանց անվան շրջանառությանը՝ Գարեգին Բ-ն ասաց.
«Յուրաքանչյուր անձի կարող է մեղադրանք ներկայացվել, պետք է այդ մեղադրանքները փաստվեն, պետք է այդ մեղադրանքները հաստատվեն, եւ այն ժամանակ կարելի է խոսել եւ քննադատել եւ պատասխանատվության կանչել, ընդհուպ՝ նաեւ եկեղեցուն, եկեղեցու ղեկավարությանը:
Երեւույթներ, այո՛: Իմ կողքին կանգնած է Նավասարդ սրբազանը, նա ստացել է նվեր, ինչ-որ ավտոմեքենա, «Բենթլի» ավտոմեքենա, եւ այդ «Բենթլի» ավտոմեքենան ինքը նվիրել է, հետագայում ինքը օտարել է, վաճառել է, գումարը նվիրել է կարիքավորներին: Եվ շահարկել նման երեւույթները, չեմ կարծում որ ճիշտ է:
Ինչու անդրադարձ չի կատարվում այն մասին, որ եկեղեցականները այսօր կարիքավորի աստիճանում իրենց առաքելությունն են իրականացնում անտրտունջ կերպով: Ծանոթացեք մեր եկեղեցականների կյանքին եւ գործունեությանը, նրանց կենցաղին, նրանց վիճակին եւ կտեսնեք. թերեւս բարվոք վիճակում ապրող մեկ-երկու եկեղեցական կա, բայց դա բնորոշը չէ դառնալու ողջ եկեղեցականության համար»:
