Լեռնային Ղարաբաղի հարցը պետք է քննարկվի նաև Թուրքիայի հետ. Մեդվեդև

Լեռնային Ղարաբաղի կարգավորման հարցը պետք է քննարկվի նաև Թուրքիայի հետ, քանի որ այդպիսին են տարածաշրջանային իրողությունները։ РИА Новости- ի փոխանցմամբ այս մասին հայտարարել է ՌԴ անվտանգության խորհրդի փոխնախագահ Դմիտրի Մեդվեդևը։

«Թուրքիան մեր հարևանն է և շատ կարևոր գործընկերը և շատ մոտ երկիր՝ Ադրբեջանի համար։ Այս գործոնը չի կարելի անտեսել»,- ասել է Մեդվեդևը։

Իսկ ԼՂ կարգավիճակի մասին խոսելով՝ վերջինս նշել է, որ կարգավիճակի հարցը լուծված չէ, սակայն հիմա խնդրի քննարկելու ժամանակը չէ, «ավելի լավ է այն տեղափոխել ապագա»։

Հիշեցնենք՝ հունվարի 30-ին Աղդամում տեղի է ունեցել՝ Արցախում հրադադարի պահպանման վերահսկողության ռուս-թուրքական մոնիթորինգային կենտրոնի բացումը։ Համատեղ կենտրոնի շտաբը ձևավորվել է պարիտետային սկզբունքով՝ հրամանատարական կետի տեսքով և յուրաքանչյուր կողմից ընդգրկվել են հավասար թվով ներկայացուցիչներ։

Այս կապակցությամբ Իլհամ Ալիևը հեռախոսազրույցներ է ունեցել նախագահներ Վլադիմիր Պուտինի և Ռեջեփ Թայիփ Էրդողանի հետ։ Ադրբեջանի նախագահը շնորհավորել է նախագահներին կենտրոնի բացման կապակցությամբ և նշել, որ այն կծառայի տարածաշրջանում խաղաղության և անվտանգության ապահովմանը։