Երեւան ներկրված նոր միկրոավտոբուսների մի մասն այսօր երթուղի է դուրս եկել։
Քաղաքապետի մամուլի քարտուղար Հակոբ Կարապետյանից «Հայկական ժամանակը» տեղեկացավ, որ նոր մեքենաները շահագործվում են առայժմ միայն մեկ՝ համար 26 երթուղում, որը Աջափնյակ վարչական շրջանի Խոպան կոչվող թաղամասից քաղաքի կենտրոնով հասնում է մինչեւ Նորք-Մարաշ վարչական շրջան։
Հիշեցնենք, որ համայնքային միջոցներով ձեռք է բերվել 100 փոքր ավտոբուս, որոնցից 30-նն արդեն Երեւանում են։ Դրանք նախատեսվում էր շահագործել 3 երթուղիներում՝ 26, 99 ու եւս մեկ նորաբաց երթուղում։
Հակոբ Կարապետյանը նշեց, որ մյուս երկու երթուղիները սկսեն նոր ավտոբուսներով սպասարկվել առաջիկա օրերին։
Նշված ավտոբուսները նախատեսվում էր շահագործել հունվարին։ Դա, սակայն, հետաձգվել էր փաստաթղթավորման համապաատսխան գործընթացը ձգձգվելու պատճառով։
