Այսօր՝ փետրվարի 10-ին, Բերդ համայնքում մեկնարկեց 2021թ.-ի ձմեռային զորակոչը: Այս մասին տեղեկացնում է Բերդի համայնքապետարանի պաշտոնական էջը:
Պարտադիր ժամկետային զինվորական ծառայության մեկնեցին համայնքի՝ այս տարվա առաջին զորակոչիկները՝ ազգային բանակը հզորացնելու գիտակցությամբ:
Ներկաները ջերմ ու երկարատև ծափողջույններով դիմավորեցին զորակոչիկներին:
Բերդ համայնքի ղեկավար Հարություն Մանուչարյանը նրանց խաղաղ ու անփորձանք ծառայություն մաղթեց. «Զորակոչիկների սիրելի՛ ծնողներ, հարազատներ, նայելով ձեր որդիներին՝ վստահ կարող եմ ասել, որ նրանք պատրաստ են ծառայության և բարձր գիտակցումով են համալրելու զինված ուժերի շարքերը: Սիրելի՛ զորակոչիկներ, դուք մեկնում եք ծառայության հուլիսյան պատերազմի տրամաբանությամբ, և, համոզված եմ, որ նույն տրամաբանությամբ էլ շարունակելու եք ձեր ծառայությունը: Բարի ծառայություն, բարի վերադարձ եմ մաղթում: Մենք սպասելու ենք ձեզ»:
ՀՀ ՊՆ զորակոչային և զորահավաքային համալրման ծառայության Տավուշի մարզի Բերդի տարածքային ստորաբաժանման ղեկավար, փոխգնդապետ Լեռնիկ Բաբայանը, դիմելով զորակոչիկներին և նրանց ծնողներին, ասաց. «Սիրելի՛ զորակոչիկներ, սիրելի՛ ծնողներ, բազում վերքեր ստանալուց հետո այսօր մեր տղաներին ուղարկում ենք հայոց բանակ՝ այն հզորացնելու, ուժեղացնելու: Սիրելի՛ զորակոչիկներ, միշտ հիշեք՝ մեր հայրենիքի որ անկյունում էլ ծառայեք, այն բոլորիս տունն է: Անփորձանք ծառայություն եմ մաղթում ձեզ»:
Բերդ քաղաքի և տարածաշրջանի հոգևոր հովիվ Տեր Արամ քահանա Միրզոյանը բարեմաղթանքներով, օրհնությամբ և Տերունական աղոթքով ճանապարհեց զորակոչիկներին. «Մեր բանակն այսօր վիրավոր է, բայց պայքարելու մեր կամքն ամուր է, ոգին՝ անսասան: Բոլորս ակամա այս օրերին հիշում ենք Մովսես Գորգիսյանի խոսքը. «Սուգը հավերժ է, եթե պայքար չկա»: Մենք չենք կարող հավերժ սգի մեջ լինել, որովհետև մեր պայքարը չի ավարտվել: Մենք պարտավոր ենք պահպանել այն, ինչ մեզ է պատկանում: … Խնդրում եմ՝ գնացե՛ք և հզորացրե՛ք հայոց բանակը: Գնացե՛ք և փրկե՛ք մեր պատիվն ու արժանապատվությունը: Միայն ուժեղ բանակ ունենալու դեպքում մենք կկարողանանք ապրել խաղաղ երկնքի ներքո: Թո՛ղ Աստծո օրհնությունը ձեզ հետ լինի, ծառայե՛ք խաղաղությամբ»:
