Հայկական երկրորդ հեռուստաընկերության անձնակազմը բողոքի ակցիա է իրականացնում ՀՀ-ում ԵՄ գրասենյակի դիմաց։ Աշխատակիցները նույնաբովանդակ նամակներ են պատրաստել, որոնք պատրաստվում են փոխանցել ԱՄՆ-ի, Ֆրանսիայի, Ռուսաստանի և մի շարք այլ դեսպանատների։
Շավարշ Գևորգյանը ներկայացրեց նամակների բովանդակությունը, որոնցում ասված է՝ Հեռուստատեսության և ռադիոյի հանձնաժողովի նախագահ Տիգրան Հակոբյանի գլխավորությամբ՝ 2021 թվականի հունվարի 15-ին կայացվել է որոշում, ըստ որի Հայկական երկրորդ հեռուստաալիքը զրկվել է վերգետնյա եթերային հեռարձակում իրականացնելու հնարավորությունից։ Հատկանշական է, որ գործող հեռուստաալիքներից միայն Հայկական երկրորդն է, որ այս որոշման արդյունքում կորցրել է հանրային մուլտիպլեքսում հեռարձակվելու իր իրավունքը։
Նամակում նաև հիշատակված է, որ վերջին տարիներին հեռուստաընկերության սեփականատիրոջ՝ Սամվել Մայրապետյանի նկատմամբ իրականացվող քաղաքական հետապնդումը, որը զուգորդվել է Հ2-ի լրագրողներին լռեցնելու բազմաթիվ հետևողական քայլերով, կասկածի տեղ չի թողնում վերջինների մոտ, որ վերը նշյալ որոշումը ամբողջապես տեղավորվում է նույն տրամաբանության մեջ։
Ավելի քան 20 տարի Հայկական երկրորդ հեռուստաալիքը հեռարձակվել է հանրապետության ամբողջ տարածքով, ըստ լրագրողների՝ այն մշտապես եղել և շարունակում է մնալ ազատ և անաչառ լրատվական միջոց։ Նրան նշեցին, որ հանրապետական ծածկույթ ունեցող ազատ ու անչառ լրատվամիջոցների եթերազրկումն աննախադեպ է ՀՀ պատմության մեջ և լրջագույն հարված է խոսքի և մամուլի ազատությանը և ամենակարևորը՝ ժողովրդավարությանը Հայաստանում։
Հեռուստաընկերությունը օրենքով սահմանված բոլոր միջոցներով պայքարելու է, որպեսզի վերականգնվի ՀՀ քաղաքացիների ազատ և անաչառ տեղեկատվություն ստանալու ժողովրդավարական հասարակության համար անչափ կարևոր իրավունքը։ Լրագրողները դիմել են նաև Դատարան, գործը ընդունվել է վարույթ, այլ մանրամասներ կհայտնեն հաջորդիվ։
Քրիստինե Հովսեփյան
